1 րոպեի ընթերցում
Կոնգոյի Դեմոկրատական Հանրապետության (ԿԴՀ) արևելքում շարունակվող հակամարտությունն իշխանություններին և միջազգային կազմակերպություններին թույլ չի տալիս վերահսկողության տակ վերցնել էբոլա համաճարակի բռնկումը: Ինչպես հաղորդում է «Արմենպրես»-ը, այս մասին հայտարարել է Առողջապահության համաշխարհային կազմակերպության (ԱՀԿ) ղեկավար Թեդրոս Ադանոմ Գեբրեյեսուսը:
«Շարունակվող բախումները հանգեցնում են բնակչության զանգվածային տեղահանման՝ վարակված անձանց հետ շփվող մարդկանց հարկադրելով պատսպարվել լեփ-լեցուն ճամբարներում և խաթարելով վարակի տարածումը զսպելու հիմնական մեխանիզմները», - գրել է նա X-ում:
ԱՀԿ գլխավոր տնօրենն ընդգծել է, որ առաջնագծում գտնվող բժշկական և մարդասիրական «աշխատողները վտանգի են ենթարկում ամեն ինչ, իսկ հարձակումները բժշկական հիմնարկությունների վրա գործնականում անհնար են դարձնում հիվանդացածների և նրանց կապերի հսկումը»: Այդ առնչությամբ Գեբրեյեսուսը բոլոր պատերազմող կողմերին կոչ է արել համաձայնվել անհապաղ հրադադարի: Նրա խոսքով՝ միայն դա ԱՀԿ-ին և նրա գործընկերներին կապահովի «անվտանգ և մշտական հասանելիություն բժշկական բրիգադների համար», որն անհրաժեշտ է համաճարակի բռնկումը զսպելու համար: