2 րոպեի ընթերցում
ԱՄՆ իշխանությունները կֆինանսավորեն մոտ 50 ժամանակավոր բուժհաստատությունների ստեղծումը Կոնգոյի Դեմոկրատական Հանրապետությունում և Ուգանդայում ՝ այդ երկրներում էբոլա տենդի բռնկման դեմ պայքարի համար: Ինչպես հաղորդում է «Արմենպրես»-ը, այս մասին ասվում է ԱՄՆ Պետքարտուարության հայտարարության մեջ։
«Միացյալ Նահանգները պարտավորվում է օպերատիվ կերպով աջակցել էբոլա տենդի բռնկման հակազդմանը՝ ֆինանսավորելով մինչև 50 բուժհաստատությունների ստեղծումը և զուգընթաց ծախսերը Կոնգոյի Դեմոկրատական Հանրապետության և Ուգանդայի այն տարածաշրջաններում, որոնք ամենաշատն են տուժել տենդից», - ասվում է հայտարարության մեջ։
Ժամանակավոր հոսպիտալները բժշկական օգնություն ցույց կտան տուժածներին, ինչպես նաև օպերատիվորեն կհայտնաբերեն վիրուսը տեղի բնակչության շրջանում։
Էբոլայի վիրուսով վարակվում են վայրի կենդանիներից։ Հիվանդության առաջին ախտանիշներն են՝ տենդը, գլխացավը, մկանային և կոկորդի ցավը։ Դրան հաջորդում են երիկամների և լյարդի ֆունկցիաների խանգարումները, որոշ դեպքերում սկսվում են ներքին և արտաքին արյունահոսություններ։ Էբոլա վիրուսով մարդու հիվանդացման առաջին դեպքը գրանցվել է ժամանակակից Կոնգոյի Դեմոկրատական Հանրապետության տարածքում 1976 թվականին:
Ախտահարվածների թվով ամենախոշոր բռնկումը տեղի է ունեցել 2014 - 2016 թվականներին Արևմտյան Աֆրիկայում՝ Գվինեայի, Լիբերիայի և Սիերա Լեոնեի տարածքում: Այդ ժամանակ մահացածների թիվը գերազանցել է 11 հազարը: