Ռեֆորմիստների կուսակցությունը Էրեբունու բնակիչներին ներկայացրել է իր նախընտրական ծրագիրը

Ռեֆորմիստների կուսակցությունն Ազգային ժողովի ընտրությունների քարոզարշավի հերթական օրն անցկացրել է Երևանի Էրեբունի վարչական շրջանում։ «Արմենպրես»-ի փոխանցմամբ՝ այս մասին «Ֆեյսբուք»-ում գրառում է կատարել կուսակցության ցուցակի 3-րդ համար Անի Ներկարարյանը։

«Էրեբունի վարչական շրջանը մեզ ջերմ ու դրական ընդունեց։ Քարոզարշավի ընթացքում քաղաքացիների կողմից զգացինք մեծ աջակցություն, անկեղծ շփում ու հավատ մեր ծրագրերի նկատմամբ։ Մարդիկ մոտենում էին, զրուցում մեզ հետ, փոխանցում իրենց մտահոգություններն ու միաժամանակ նաև դրական էներգիա ու ոգևորություն։ Այդ վստահությունն ու աջակցությունը մեզ համար մեծ պատասխանատվություն և ուժ են՝ շարունակելու մեր ճանապարհը։ Շնորհակալ ենք Էրեբունու բնակիչներին ջերմ ընդունելության համար։ Միասին՝ դեպի անվտանգ և զարգացող Հայաստան»,- գրել է Ներկարարյանը։

Էրեբունի վարչական շրջանում քարոզարշավի ընթացքում Ռեֆորմիստների կուսակցության ցուցակի անդամները քաղաքացիներին ներկայացրել են իրենց նախընտրական ծրագիրը։

Մայիսի 8-ին մեկնարկել է Հայաստանում հունիսի 7-ին կայանալիք խորհրդարանական ընտրությունների նախընտրական քարոզարշավը, որը կշարունակվի մինչև հունիսի 5-ը։ Ընտրություններին մասնակցելու համար գրանցվել է 19 քաղաքական ուժ՝ 2 դաշինք և 17 կուսակցություն։ Ռեֆորմիստների կուսակցությունը ընտրություններին մասնակցում է «Անվտանգություն և զարգացում» կարգախոսով և 1 համարի ներքո։ Կուսակցությունը ԿԸՀ է ներկայացրել 83 թեկնածուից բաղկացած ընտրական ցուցակ։ Կուսակցության վարչապետի թեկնածուն պաշտպանության նախկին նախարար Վաղարշակ Հարությունյանն է։