«Լուսավոր Հայաստան»-ն ընտրվելու դեպքում խոստանում է ամբողջությամբ փոխել դատական համակարգը

«Լուսավոր Հայաստան» կուսակցությունը հունիսի 7-ին Հայաստանում կայանալիք խորհրդարանական ընտրությունների նախընտրական քարոզարշավի չորրորդ օրը սկսել է Երևանի կենտրոնում՝ Բարձրագույն դատական խորհրդի շենքի մոտից։

«Արմենպրես»-ի հաղորդմամբ՝ կուսակցության նախագահ Էդմոն Մարուքյանը լրագրողների հետ ճեպազրույցում պարզաբանել է, թե ինչու է կուսակցությունն իր այսօրվա քարոզարշավը սկսում հենց ԲԴԽ շենքի բակից։

Մարուքյանը քննադատել է Բարձրագույն դատական խորհրդի գործունեությունը՝ ընդգծելով, որ այդ մարմինը դատական ամենաբարձր և ամենաանկախ մարմինը պետք է լինի, սակայն վերջին 8 տարվա ընթացքում խոստացված բարեփոխումները չեն իրականացվել։ 

Նա նաև նշել է, որ ԲԴԽ-ում վերջին 8 տարիների ընթացքում 5 նախագահ է փոխվել, ինչը չի խոսում անկախ մարմին լինելու մասին։

Մարուքյանի խոսքով՝ հասարակությունն այժմ բացասական վերաբերմունք ունի ՀՀ դատական համակարգի նկատմամբ։ 

«Սիրելի հայրենակիցներ, դուք հունիսի 7-ին հնարավորություն ունեք քվեարկելու մեր օգտին, և մենք ամբողջությամբ կփոխենք այս համակարգը»,-ասել է Մարուքյանը։

Մայիսի 8-ին մեկնարկել է հունիսի 7-ին կայանալիք խորհրդարանական ընտրությունների նախընտրական քարոզարշավը, որը կշարունակվի մինչև հունիսի 5-ը։ Ընտրություններին մասնակցելու համար առաջադրվել է 19 քաղաքական ուժ՝ 2 դաշինք և 17 կուսակցություն։

«Լուսավոր Հայաստան» կուսակցությունը ընտրություններին մասնակցում է 19 համարի ներքո։Կուսակցության կարգախոսն է՝ «Պաշտպանիր ինքնությունդ»։ Կուսակցությունը ԿԸՀ է ներկայացրել 89 թեկնածուից բաղկացած ընտրական ցուցակ, որը գլխավորում է Էդմոն Մարուքյանը։