Հաղթանակներ հնարավոր է կերտել նաև դիվանագիտության, գիտության և արվեստի մեջ. Մարուքյան

«Հաղթանակ» զբոսայգում «Լուսավոր Հայաստան» կուսակցության ներկայացուցիչները հարգանքի տուրք են մատուցել հաղթանակներ կերտած հերոսների հիշատակին։ «Արմենպրես»-ի հաղորդմամբ՝ մայիսի 9-ին Հաղթանակի զբոսայգում լրագրողների հետ զրույցում «Լուսավոր Հայաստան» կուսակցության առաջնորդ Էդմոն Մարուքյանը նշել է.

«Ցանկանում եմ փառք տալ բոլոր հերոսներին՝ պատերազմի մասնակից իմ պապերից սկսած, մեր բոլոր ծնողներին ու այն սերունդներին, որոնք հաղթանակ են կերտել։ Այդ հաղթանակը իրական է եղել, մենք դա տեսել ենք, ապրել ենք, դա պատրանքային չի եղել։ Հետո էլ պատերազմ է եղել, մի անգամ էլ պարտվել ենք, բայց մեր ազգը կրկին կարող է հաղթել, և ես ձեզ ասեմ՝ էլի հաղթելու ենք։ Հաղթանակը նաև դիվանագիտական դաշտում կա, ֆուտբոլում, արվեստում, գիտության մեջ, այսինքն՝ ամեն տեղ կարող է լինել հաղթանակ։ Հիմա չի կարելի հաղթանակը միայն վերագրել պատերազմին ու արյանը։ Մի ազգ, որը ատոմակայան է կառուցել, մի ազգ, որն այսքան բան է ստեղծել, այո, պատերազմում էլ է հաղթանակ կերտել և կարող է կրկին հաղթել»։

Մարուքյանն ընդգծել է, որ իրենց իշխանության գալու պարագայում դիվանագիտական դաշտում միանշանակ հաղթելու են։

Մայիսի 8-ին մեկնարկել է հունիսի 7-ին Հայաստանում կայանալիք խորհրդարանական ընտրությունների նախընտրական քարոզարշավը, որը կշարունակվի մինչև հունիսի 5-ը։ Ընտրություններին մասնակցելու համար գրանցվել է 19 քաղաքական ուժ՝ 2 դաշինք և 17 կուսակցություն։ Էդմոն Մարուքյանի գլխավորած ուժը՝ «Լուսավոր Հայաստան» կուսակցությունը մասնակցում է ընտրություններին։ Ուժի քվեաթերթիկի համարն ընտրական ցուցակում 19-րդ է, ցուցակում ընդգրկված են 89 թեկնածու: