Կոշտան շնորհակալություն է հայտնել Փաշինյանին Հայաստանը Եվրամիությանը ավելի մոտեցնելու համար

Եվրոպական խորհրդի նախագահ Անտոնիու Կոշտան Եվրոպական քաղաքական համայնքի գագաթնաժողովի իր ելույթում շնորհակալություն է հայտնել Հայաստանի վարչապետ Նիկոլ Փաշինյանին՝ խիզախ քաղաքական որոշումների համար, որը նա կայացրել է՝ Հայաստանին ավելի մոտեցնելով Եվրամիությանը։

«Արմենպրես»-ի հաղորդմամբ՝ Կոշտան որպես փաստ նշել է Հայաստանում անցկացվող գագաթնաժողովը։

«Վստահ եմ, որ այսօր և հաջորդող գագաթնաժողովներին ԵՔՀ-ն կդառնա գործողությունների հիմնական խթանը. գործողություններ, որոնք միտված կլինեն աջակցելու Ուկրաինային, Մոլդովային և Հայաստանին ու միաժամանակ կապահովեն եվրոպական կոալիցիայի ստեղծումը  թմրանյութերի դեմ պայքարի գործում»,-ասել է նա։

Եվրոպական խորհրդի նախագահը գագաթնաժողովը պատմական է համարել, քանի որ առաջին անգամ ԵՔՀ-ն անցկացվում է Հարավային Կովկասում։

«Այն պատմական է, քանի որ այսօրվա գագաթնաժողովը հնարավոր է դարձել Հայաստանի և Ադրբեջանի միջև կնքված համաձայնագրի շնորհիվ. այդ համաձայնագիրը խաղաղության պատմություն է Եվրոպայում, որը պետք է նշվի այն աշխարհում, որտեղ, կարծես, գերիշխում են լարվածությունն ու պատերազմը, պատմական է, քանի որ գագաթնաժողովին  մասնակցում է նաև ոչ եվրոպացի գործընկեր՝ Կանադայի վարչապետը»,-ասել է նա՝ հավելելով, որ Կանադան կիսում է Եվրոպայի գլոբալ անվտանգության տեսլականն ու ցանկանում է ստեղծել միջազգային կարգ, որը հենված է միջազգային մարդասիրական իրավունքի վրա։