3 րոպեի ընթերցում
Ուկրաինայի նախագահ Վոլոդիմիր Զելենսկին Եվրոպական քաղաքական համայնքի 8-րդ ագագաթնաժողովում ելույթի ժամանակ Հայաստանին և Ադրբեջանին մաղթեց կայուն, համապարփակ և տևական խաղաղություն։
«Արմենպրես»-ի հաղորդմամբ՝ Վոլոդիմիր Զելենսկին կարևորեց Հայաստանի մասնակցությունն այս լայնամասշտաբ ձևաչափում՝ բոլոր եվրոպացիների հետ միասին։
Նա նշանակալից փաստ համարեց այն, որ 24 տարվա ընթացքում Ուկրաինայի նախագահն առաջին անգամ այցելում է Հայաստան։
«Մարտահրավերներն ակնհայտ են։ Առաջին հերթին մենք բոլորս տեսնում ենք, որ Իրանում պատերազմը դեռևս շարունակվում է չվճռված մնալ, և դա կարող է երկար ժամանակ անկայունության պատճառ դառնալ։ Եվ սա կարող է հանգեցնել լուրջ քաղաքական փոփոխությունների։ Ուստի, առաջին հերթին, մեր էներգետիկ և անվտանգության համագործակցությունը պետք է լինի իրական համագործակցություն, և մենք պետք է միմյանց օգնենք ձմռանը նախապատրաստվելու և էներգետիկ մարտահրավերների հաղթահարման գործում, ինչպես նաև պետք է ջանքեր գործադրենք Հորմուզի նեղուցի և Իրանի ժողովրդի համար երկարաժամկետ լուծում գտնելու ուղղությամբ»,-նշեց Զելենսկին։
Ուկրաինայի նախագահը նշեց նաև, որ Ռուսաստանի պատերազմը Ուկրաինայի և Եվրոպայի դեմ շարունակվում է նույնքան ուժգին, որքան նախկինում։ Ըստ նրա՝ այս ամառը լինելու է այն ժամանակահատվածը, երբ ՌԴ նախագահը կորոշի՝ հաջորդ քայլը որն է լինելու՝ պատերազմը ընդլայնել, թե՞ դիմել դիվանագիտության։
«Ես երախտապարտ եմ բոլոր առաջնորդներին՝ ռազմական արդյունաբերության և ռուսական բանկերի դեմ ուղղված պատժամիջոցների համար։ Մենք պետք է շարունակենք այս ճնշումը։ Քանի դեռ այս պատերազմը շարունակվում է, Ուկրաինային ցուցաբերվող ամուր աջակցությունը պետք է շարունակվի։
Մենք պետք է կենտրոնանանք այն բանի վրա, թե ինչ ենք անելու, եթե Ռուսաստանը չդադարեցնի այս պատերազմը։ Մեզ անհրաժեշտ է շարունակական ճնշում և խաղաղություն։ Եվ, իհարկե, առաջնայինը հետևյալն է՝ մենք պետք է գտնենք կիրառելի դիվանագիտական ձևաչափ, և Եվրոպան պետք է ներկա լինի ցանկացած բանակցությունների սեղանի շուրջ»,-ասաց Ուկրաինայի նախագահը։
Նա ընդգծեց, որ պետք է մշտապես կապի մեջ լինեն ԱՄՆ-ի հետ և հասկանան նրանց տեսակետներն ու դիրքորոշումները։ Սակայն, ըստ նրա, լավ կլիներ, եթե Ռուսաստանի հետ բանակցությունների համար կարողանային ձևավորել մեկ ընդհանուր եվրոպական ձայն։