Իսրայելի նախագահը պատրաստակամություն է հայտնել բարելավել հարաբերությունները Լիբանանի հետ

Իսրայելի նախագահ Իցհակ Հերցոգը Լիբանանի հետ բարիդրացիական հարաբերություններ հաստատելու ցանկություն է հայտնել: «Արմենպրես»-ի փոխանցմամբ՝ այս մասին հաղորդում է ՏԱՍՍ գործակալությունը։

Իսրայելի անկախության օրվա առթիվ դիվանագետների համար կազմակերպված ընդունելության ժամանակ իր ելույթում նախագահը նշել է, որ  երազում է ազատորեն մեքենայով գնալ Բեյրութ և բարեկամանալ լիբանանցիների հետ։

«Իսրայելը անհամբեր սպասում է ձեզ բոլորիդ հետ համագործակցելուն՝ օգնելու ստեղծել Մերձավոր Արևելք, որտեղ մեր բոլոր որդիներն ու դուստրերը կժառանգեն հնարավորություններ, այլ ոչ թե վախ, որ նրանք ժառանգեն վաղվա խոստումը, այլ ոչ թե երեկվա հակամարտությունները», - նշել է Հերցոգը։

Նախագահը նաև հաջողություն է մաղթել իսրայելական և լիբանանյան բանակցային թիմերին, որոնք ապրիլի 23-ին Վաշինգտոնում բանակցությունների նոր փուլ կանցկացնեն։

«Ես նրանց մեծ հաջողություն եմ մաղթում Իսրայելի և Լիբանանի միջև խաղաղության հասնելու գործում։ Բայց որպեսզի դա տեղի ունենա, Իսրայելը պետք է ապահովի իր սահմանները», - ընդգծել է Հերցոգը։

Լիբանանի նախագահ Ժոզեֆ Աունն իր հերթին ապրիլի 22-ին հայտարարել է, որ հրադադարի ռեժիմի երկարաձգման շուրջ բանակցությունները շարունակվում են։ Նա զգուշացրել է, որ ոչ մի կողմի թույլ չի տրվի խոչընդոտել անվտանգության միջոցառումները կամ խաթարել կայունությունը։

«Մեր երկրի պատմության այս փուլում քաղաքացիական խաղաղության պահպանումը կարմիր գիծ է», - ասել է Աունը՝ հավելելով, որ «չի խնայի ոչ մի ջանք Լիբանանում տիրող աննորմալ իրավիճակը վերացնելու համար»։

Իսրայելն ու Լիբանանը դիվանագիտական ​​հարաբերություններ չունեն 1948 թվականին հրեական պետության հռչակումից ի վեր։ Թել Ավիվից մինչև Բեյրութ ուղիղ գծով հեռավորությունը ավելի քան 200 կիլոմետր է, սակայն երկրների միջև ցամաքային սահմանը փակ է, ինչն անհնար է դարձնում մեքենայով ճանապարհորդությունը։ Իսրայելի և Լիբանանի միջև նաև օդային հաղորդակցություն չկա։

Ապրիլի 14-ին Միացյալ Նահանգներում տեղի են ունեցել Իսրայելի և Լիբանանի միջև 43 տարվա ընթացքում առաջին ուղիղ բանակցությունները։ Երկու կողմերը ներկայացված էին դեսպանների մակարդակով։