Բեռլինում հույս ունեն, որ Մադյարի հաղթանակը ճանապարհ կհարթի ԵՄ-ի կողմից Ուկրաինային վարկ հատկացնելու համար
1 րոպեի ընթերցում
Գերմանիայի արտաքին գործերի նախարարության ներկայացուցիչ Ստեֆան Կոռնելիուսը հայտարարել է, որ Բեռլինում հույս ունեն, որ Հունգարիայի ընտրությունների ելքը կազդի Ուկրաինային 90 միլիարդ եվրոյի վարկի արագ հատկացման վրա: «Արմենպրես»-ի փոխանցմամբ՝ այս մասին հաղորդում է «Ինտերֆաքս» գործակալությունը։
«Հույս կա, որ Ուկրաինային աջակցության վարկը կտրամադրվի շատ շուտով, - հայտարարել է Կոռնելիուսը։ - Գերմանիայի կառավարությունը բոլոր ջանքերը գործադրում է դրա համար և, հետևաբար, անհամբերությամբ սպասում է Հունգարիայում կառավարության արագ ձևավորմանը»։
Իր հերթին, Bloomberg-ը, հղում անելով կիպրացի պաշտոնյայի, տեղեկացնում է, որ Կիպրոսը, որը ներկայում նախագահում է ԵՄ-ում և որոշում է քաղաքականության բազմաթիվ առաջնահերթություններ, առաջիկայում այս հարցը կբարձրացնի անդամ երկրների հանդիպման ժամանակ։
Հունգարիայի վարչապետ Վիկտոր Օրբանն ապրիլի 12-ի երեկոյան ճանաչել է խորհրդարանական ընտրություններում պարտությունը և հաղթանակի կապակցությամբ շնորհավորել ընդդիմադիր «Տիսա» կուսակցության առաջնորդ Պետեր Մադյարին։