2 րոպեի ընթերցում
Ռուսաստանի նախագահ Վլադիմիր Պուտինը հայտարարել է, որ Մոսկվան ըմբռնումով է մոտենում Հայաստանում ընթացող նախընտրական գործընթացներին՝ հույս հայտնելով, որ դրանք չեն ազդի հայ-ռուսական հարաբերությունների վրա։ «Արմենպրես»-ի հաղորդմամբ՝ ՀՀ վարչապետ Նիկոլ Փաշինյանի հետ հանդիպման ընթացքում Պուտինը նշել է, որ Հայաստանում ներքաղաքական գործընթացները ակտիվ փուլում են։
«Մենք տեսնում ենք, որ Հայաստանում ներքաղաքական գործընթացները թափ են հավաքում, և շուտով ընտրություններ են»,- ասել է նա։
ՌԴ նախագահի խոսքով՝ նախընտրական շրջանում քաղաքական լարվածությունը բնական է, սակայն այն չպետք է անդրադառնա երկկողմ հարաբերությունների վրա։
«Կարևորն այն է, որ այս սրացումները ոչ մի կերպ չեն վնասել մեր հարաբերություններին»,- ընդգծել է Պուտինը։
Միաժամանակ նա նշել է, որ Ռուսաստանը Հայաստանում ունի բազմաթիվ գործընկերներ և կապեր։
«Մենք Հայաստանում շատ ընկերներ ունենք, շատ-շատ։ Մենք դա գիտենք»,- ասել է նա՝ հավելելով, որ Ռուսաստանի Դաշնությունում բնակվում է ավելի քան 2 միլիոն հայ։
Պուտինը նաև հույս է հայտնել, որ Հայաստանում գործող տարբեր քաղաքական ուժերը, այդ թվում՝ ռուսամետները, կկարողանան մասնակցել ընտրություններին։
«Մենք շատ կցանկանայինք, որ բոլոր այդ քաղաքական կուսակցությունները և գործիչները կարողանան մասնակցել այս ներքաղաքական գործընթացներին ընտրությունների ընթացքում»,- նշել է նա։
Միևնույն ժամանակ ՌԴ նախագահը ընդգծել է, որ Ռուսաստանը չի միջամտում Հայաստանի ներքին գործերին։
«Դա ձեր որոշումն է, մենք չենք միջամտում»,- ասել է նա՝ անդրադառնալով Հայաստանում ազատազրկման մեջ գտնվող որոշ գործիչներին։