1 րոպեի ընթերցում
Ճապոնիայի վարչապետ Սանաե Տակաիչին Տոկիոյում ընդունել է Ֆրանսիայի նախագահ Էմանուել Մակրոնին: Կողմերի քննարկման օրակարգում են եղել պատերազմը Մերձավոր Արևելքում, անվտանգությունը, գործակցությունը տիեզերքի ոլորտում: «Արմենպրես»-ի փոխանցմամբ՝ այս մասին հաղորդում է France 24-ը:
Մակրոնը բարձր է գնահատել Ֆրանսիայի «պատմական» հարաբերությունները Ճապոնիայի հետ: Երկու ղեկավարները հանդիպումից հետո կայացած մամուլի ասուլիսում հայտարարել են, որ միասին կաշխատեն Հորմուզի նեղուցով նավագնացության ազատությունը վերականգնելու ուղղությամբ:
Եռօրյա այցի շրջանակում Մակրոնը նաև հանդիպել է երկրի գործարար ոլորտի ղեկավարների հետ: Նախատեսվում է նաև նրա հանդիպումը Ճապոնիայի կայսր Նարուհիտոյի հետ:
Reuters-ը հաղորդում է, որ Մակրոնին Տոկիո այցի ընթացքում ուղեկցում են պաշտպանության և արտաքին գործերի նախարարներ Կատրին Վոտրենը և Ժան-Նոել Բարոն: Նրանք իրենց պաշտոնակիցների հետ քննարկել են Մերձավոր Արևելքում հակամարտությունը և Հորմուզի նեղուցի փակումը, ինչպես նաև երկկողմ նախաձեռնությունները: Երկու երկրների միջև պաշտպանության ոլորտում համագործակցության համաձայնագրեր են ստորագրվել: Ընդգծվել է սերտ հարաբերությունների պահպանման կարևորությունը: