2 րոպեի ընթերցում
Հայաստանի հունահռոմեական ոճի ըմբշամարտի հավաքականի գլխավոր մարզիչ Արմեն Բաբալարյանն ամփոփել է Եվրոպայի Մ23 տարեկանների առաջնությունում հայ մարզիկների ելույթները:
«Եվրոպայի այս առաջնությունում ունեցանք երկու ոսկե, մեկ արծաթե ու մեկ բրոնզե մեդալ: Գերծանր քաշային ըմբիշները սկսել են կոտրել այն կարծրատիպը, թե գերծանր քաշային կարգում մեր հավաքականի անդամները մրցունակ չեն: Սակայն տղաներն ու մարզական շտաբն աշխատասիրությամբ են մոտենում մրցաշարերին: Ընդհանուր առմամբ, ես գոհ եմ, կարող էինք նաև մեկ կամ երկու մեդալ ավելի ունենալ, սակայն այս պահին` այսքանը»,-«Արմենպրես»-ի մամուլի սրահում լրագրողների հետ հանդիպման ժամանակ ասաց Բաբալարյանը:
Վերջինիս խոսքով` Եվրոպայի Մ23 տարեկանների այս առաջնությանը մի շարք նոր մրցավարներ կային, որոնք նոր որակներ են բերել մրցաշարին:
«Թե երիտասարդ ըմբիշների, թե մեծահասակների թիմում ունենք Օլիմպիական խաղերի ուղեգիր նվաճելու ներուժ ունեցող ըմբիշներ: Իսկ ինչ վերաբերվում է Եվրոպայի մեծահասակների առաջնությանն, ապա թիմում շատ երիտասարդների կտեսնեք»,-ընդգծեց նա:
Մ23 տարեկանների Եվրոպայի առաջնությունում Հայաստանի հունահռոմեական ոճի հավաքականից ոսկե մեդալակիրներ էին դարձել Արամայիս Հարությունյանն ու Սուրեն Աղաջանյանը, արծաթե մեդալակիր` Սամվել Տերտերյանը։ Մանվել Խաչատրյանը դարձել էր բրոնզե մեդալակիր: