Պետբյուջեի միջոցներով նախորդ տարի կառուցվել, վերակառուցվել, հիմնանորոգվել է ավելի քան 500 կմ ճանապարհ
2 րոպեի ընթերցում
Հայաստանի պետական բյուջեի միջոցներով 2025 թվականին Հայաստանում կառուցվել, վերակառուցվել, նորոգվել և հիմնանորոգվել է 504.5 կմ ընդհանուր ճանապարհ:
«Արմենպրես»-ի հաղորդմամբ՝ այս մասին ասաց Տարածքային կառավարման և ենթակառուցվածքների նախարար Դավիթ Խուդաթյանն ԱԺ տնտեսական հարցերի մշտական հանձնաժողովի նիստում Հայաստանի Հանրապետության կառավարության ծրագրի (2021-2026 թթ.) 2025 թվականի կատարման ընթացքի և արդյունքների մասին զեկույցի ներկայացմանը:
«2025 թվականի ընթացքում Հայաստանի պետական բյուջեի միջոցներով Հայաստանում կառուցվել, վերակառուցվել, նորոգվել և հիմնանորոգվել է 504.5 կիլոմետր ընդհանուր ճանապարհ, որից 135 կիլոմետրը՝ միջպետական, շուրջ 200 կիլոմետրը՝ հանրապետական և շուրջ 170 կիլոմետրը մարզային նշանակության ճանապարհներ են»,-ասաց Խուդաթյանը:
Նա հավելեց՝ ամբողջովին պատրաստ է Հյուսիս-հարավ ճանապարհային միջանցքի՝ Աշտարակից դեպի Գյումրի գնացող հատվածը: Առաջիկայում այնտեղ բացման միջոցառում կիրականացվի: Նախարարի խոսքով՝ սա կենսական նշանակություն ունի Հայաստանի համար: Շինարարական աշխատանքները նախորդ տարվա ընթացքում ամբողջությամբ ավարտվել են:
Անդրադառնալով Հյուսիս-հարավի մեկ այլ՝ Քաջարանից Ագարակ գնացող 32 կիլոմետրանոց հատվածին՝ Խուդաթյանն ասաց, որ շինարարական ակտիվ աշխատանքներ են իրականացվում:
Այդ հատվածում նախատեսված 2 թունելներն արդեն փորված են: Նախատեսված է նաև կառուցել 15 կամուրջ, 14-ի աշխատանքներն ընթացքի մեջ են: