Գերմանիայի ԱԳ նախարարը Հունգարիային կոչ է արել վերանայել ՌԴ-ի դեմ պատժամիջոցների 20-րդ փաթեթն արգելափակելու որոշումը
2 րոպեի ընթերցում
Գերմանիայի արտաքին գործերի նախարար Յոհան Վադեֆուլը Հունգարիային կոչ է արել վերանայել Մոսկվայի դեմ պատժամիջոցների հերթական փաթեթի ընդունումն արգելափակելու որոշումը: «Արմենպրես»-ի փոխանցմամբ՝ այս մասին հաղորդում է Reuters գործակալությունը:
«Ես զարմացած եմ Հունգարիայի դիրքորոշման պատճառով: Մենք դա կքննարկենք մեր հունգարացի գործընկերների հետ.... Մենք ևս մեկ անգամ հունգարացիներին կներկայացնենք մեր փաստարկներն ինչպես Բուդապեշտում, այնպես էլ այստեղ՝ Բրյուսելում, և կխնդրենք նրանց վերանայել իրենց դիրքորոշումը», - ասել է Վադեֆուլը Բրյուսելում ԵՄ արտաքին գործերի նախարարների հանդիպմանը ժամանելիս:
Դիվանագետը շեշտել է, որ անհրաժեշտ է շարունակել Ռուսաստանի նկատմամբ ճնշումը և կայուն աջակցություն ցուցաբերել Ուկրաինային:
Եվրամիության երկրների արտգործնախարարները Բրյուսելում քննարկում են Ռուսաստանի դեմ պատժամիջոցների 20-րդ փաթեթը, որը նախատեսվում էր ընդունել Ուկրաինայի դեմ ՌԴ-ի ծավալած ռազմական գործողությունների 4-րդ տարելիցին ընդառաջ: ԵՄ դիվանագիտության ղեկավար Կայա Կալասը հայտարարել է, որ փաթեթն, ամենայն հավանականությամբ, չի ընդունվի Հունգարիայի դիրքորոշման պատճառով:
Հունգարիայի արտգործնախարար Պետեր Սիյարտոն ավելի վաղ հայտարարել էր, որ Բուդապեշտը կարգելափակի Ռուսաստանի դեմ պատժամիջոցների 20-րդ փաթեթը: Այս քայլով Հունգարիան փորձում է Ուկրաինային ստիպել վերսկսել «Դրուժբա» խողովակաշարով ռուսական նավթի մատակարարումները: Սլովակիան և Հունգարիան Կիևին մեղադրում են ռուսական հարվածներից վնասված խողովակաշարի վերանորոգումը դիտավորյալ հետաձգելու համար: