367.47
Իրանի և Ռուսաստանի ԱԳ նախարարները քննարկել են երկկողմ համագործակցության ամրապնդման հարցեր
2 րոպեի ընթերցում
Իրանի արտաքին գործերի նախարար Աբբաս Արաղչին Մոսկվայում հանդիպել է Ռուսաստանի արտաքին գործերի նախարար Սերգեյ Լավրովի հետ։
«Արմենպրես»-ի փոխանցմամբ՝ այս մասին հայտնում է Mehr գործակալությունը։
«Ես կցանկանայի առանձին շնորհակալություն հայտնել իմ ռուս գործընկերներին, Ռուսաստանի Դաշնությանը մեր միջուկային օբյեկտների վրա ԱՄՆ-ի և Իսրայելի հարձակումների ժամանակ ցուցաբերած աջակցության համար։ Մենք պետք է ձեզ հետ սերտ խորհրդակցություններ անցկացնենք հնարավոր ապագա իրադարձությունների վերաբերյալ», - ասել է Արաղչին։
Նա նաև ընդգծել է, որ Թեհրանի և Մոսկվայի միջև հարաբերություններն օրեցօր խորանում են։
Արաղչիի խոսքով՝ Ռուսաստանի հետ ունեն ընդհանուր դիրքորոշումներ շատ հարցերի շուրջ՝ հավելելով, որ ԱՄՆ-ի միակողմանի քաղաքականության պայմաններում իրենց դիրքորոշումները նույնն են։
Նա նշել է, որ էներգետիկ ոլորտը Իրանի և Ռուսաստանի միջև համագործակցության ոլորտներից մեկն է, և որ ունեն բազմաթիվ համատեղ նախաձեռնություններ և նախագծեր՝ պատժամիջոցներին դիմակայելու, գազի և նավթի փոխադրման և վաճառքի ոլորտում համագործակցություն հաստատելու վերաբերյալ։
«Այսօր մենք հնարավորություն ունենք ավելի մանրամասն վերանայել մեր հարաբերությունները և ամրապնդել համակարգումը։ Մենք նաև հնարավորություն ունենք կարծիքներ փոխանակել տարածաշրջանային և միջազգային հարցերի շուրջ»,- ասել է նախարարը։
«Իրան-Ռուսաստան հարաբերությունները բնութագրվում են իրենց համապարփակությամբ և բազմակողմանիությամբ, քանի որ դրանք ներառում են քաղաքական, տնտեսական, մշակութային, պաշտպանական և անվտանգության բոլոր ոլորտները»,- ընդգծել է Արաղչին՝ հավելելով, որ Իրանի և Ռուսաստանի միջև խորհրդակցությունները շարունակվում են, և երկու երկրները գտնվում են համագործակցության բարձր մակարդակի վրա։
Հանդիպման ընթացքում նախատեսվում է ստորագրել երկու երկրների արտաքին գործերի նախարարությունների միջև համագործակցության համաձայնագիր։
Բաժանորդագրվեք մեր ալիքին Telegram-ում