Գեղարքունիքում մեկնարկել է դպրոցականների առարկայական օլիմպիադայի ներդպրոցական փուլը

Գեղարքունիքի մարզի հանրակրթական  դպրոցներում մեկնարկել է ՀՀ դպրոցականների 2025-2026 ուսումնական տարվա առարկայական օլիմպիադայի ներդպրոցական փուլը։ 

Ինչպես «Արմենպրես»-ին տեղեկացրին Գեղարքունիքի մարզպետի աշխատակազմի ԿՄՍ վարչությունից, օլիմպիադային մասնակցելու նպատակով մարզում հայտագրվել է 10945 աշակերտ, որից 1173-ը՝ հայոց լեզու, 821-ը՝ հայ գրականություն, 1237-ը՝ մայրենի, 857-ը՝ պատմություն, 2807-ը՝ մաթեմատիկա, 433-ը՝ ֆիզիկա, 14-ը՝ աստղագիտություն, 579-ը՝ կենսաբանություն, 204-ը՝ ինֆորմատիկա, 364-ը՝ քիմիա, 406-ը՝ աշխարհագրություն, 562-ը՝ ՆԶՊ, 793-ը՝ ռուսաց լեզու, 520-ը՝ անգլերեն, 20-ը՝ ֆրանսերեն և 155-ը՝ գերմաներեն առարկաներից։

Նշված առարկաներից ինֆորմատիկայի օլիմպիադան անցկացվում է առցանց եղանակով, իսկ մայրենին գնահատվում է տեղում, առանց ձևաթղթի, հարցման միջոցով։ 

Առարկայական օլիմպիադայի ներդպրոցական փուլը կշարունակվի մինչև դեկտեմբեր, որի արդյունքում տարբեր առարկաներից լավագույն արդյունք ցուցաբերած դպրոցականներն իրենց գիտելիքները կստուգեն նաև օլիմպիադայի մարզային փուլի ընթացքում։