2 րոպեի ընթերցում
ԱՄՆ նախագահ Դոնալդ Թրամփը Սենատում հանրապետականներին կոչ է արել նոյեմբերի 5-ից դադարեցնել շաթդաունը՝ դեմոկրատներին զրկելով ֆիլիբաստերի կանոնի (տևական քննարկումների) միջոցով բյուջեի ընդունումն արգելափակելու հնարավորությունից: «Արմենպրես»-ի հաղորդմամբ՝ այդ մասին ԱՄՆ նախագահը հայտարարել է սենատորների հետ նախաճաշի ընթացքում:
«Կարծում եմ, դա շատ կարևոր է՝ մեզ անհրաժեշտ է բացել երկիրը: Եվ դա այսօր կեսօրին անելու միջոցը ֆիլիբաստերի կանոնի չեղարկումն է»,- նշել է նա:
Թրամփը զգուշացրել է, որ առանց այս ընթացակարգի չեղարկման (այն փոքրամասնությանը հնարավորություն է տալիս խոչընդոտել որոշումների ընդունմանը) Կոնգրեսը կաթվածահար կլինի առաջիկա տարիներին:
Նա ընդգծել է, որ Կոնգրեսը նախկինում միշտ համաձայնել է ժամանակավոր երկարաձգումներին, սակայն առաջին անգամ դա տեղի չի ունեցել:
ԱՄՆ-ում հոկտեմբերի 1-ից սկսվել է ֆինանսական նոր տարին, բայց Կոնգրեսը դեռ չի հասցրել համաձայնեցնել բյուջեն, ինչի հետևանքով կառավարությունը չի կարողանում աշխատել: Միացյալ Նահանգներում այսպիսի շաթդաունը ենթադրում է Կոնգրեսի կողմից ուղղակիորեն ֆինանսավորվող պետական որոշ հաստատությունների աշխատանքի դադարեցում՝ ֆինանսական հաջորդ տարվա բյուջեի չհամաձայնեցված լինելու պատճառով:
Թրամփն ավելի վաղ հայտարարել էր, որ կառավարության աշխատանքի ժամանակավոր դադարեցումը կարող է օգտագործել աշխատակազմի և վճարումների զանգվածային կրճատումներ կատարելու համար: Նա պնդել է, որ բյուջեի հետ կապված խնդիրը ծագել է դեմոկրատների դիրքորոշման պատճառով, իսկ ստեղծված իրավիճակը Սպիտակ տունը օգտագործում է հանրապետականներին դուր չեկող ծրագրերից ձերբազատվելու համար: