1 րոպեի ընթերցում
Քաղաքացիական հիվանդանոց տեղափոխված «Արմավիր» քրեակատարողական հիմնարկի կալանավորված անձը փորձել է փախուստի դիմել, սակայն քրեական ծառայողը կանխել է փախուստը: «Արմենպրես»-ի փոխանցմամբ՝ այս մասին հայտնում են Հայաստանի արդարադատության նախարարության քրեակատարողական ծառայությունից:
«Հոկտեմբերի 22-ին ժամը 19։10-ի սահմաններում հետազոտման նպատակով քաղաքացիական հիվանդանոց տեղափոխված «Արմավիր» քրեակատարողական հիմնարկի կալանավորված անձը, ցած թռչելով հիվանդանոցի պատուհանից, դիմել է փախուստի։
Քրեակատարողական ծառայողը, սպառելով կալանավորված անձի փախուստը կանխելու բոլոր մյուս միջոցները, մեկ նախազգուշական կրակոց է օդ արձակել, սակայն կալանավորված անձը չի ենթարկվել և անցնելով հիվանդանոցի դարպասից դեպի դուրս` շարունակել է փախուստը։
Ծառայողը կրակել է կալանավորված անձի ոտքի շրջանում և այդպիսով կանխել վերջինիս փախուստը»,- նշված է Քրեակատարողական ծառայության տարածած հաղորդագրության մեջ:
Կալանավորված անձին ցուցաբերվել է բուժօգնություն, ըստ բժշկական գնահատման` նրա կյանքին վտանգ չի սպառնում։