Ինչո՞ւ դառնալ գիտնական, և ինչպե՞ս է գիտությունը ծառայում պետության զարգացմանը. պատասխանները՝ Ազատության հրապարակում

Երևանում արդեն երկրորդ օրը շարունակվող «Գիտության շաբաթ. Հայաստան» միջոցառումն այս տարի միտված է պետության զարգացման գործում գիտության դերի ընդգծմանը: «Արմենպրես»-ի թղթակցի հետ զրույցում նախագծի նպատակն այսպես ձևակերպեց այս նախաձեռնության հանրահռչակման և հասարակության հետ կապերի ղեկավար Լիլիթ Մարգարյանը:

Նախորդ տարվա համեմատ որոշակիորեն փոխվել է միջոցառման ձևաչափը, ավելացել են մասնակցող նոր կազմակերպություններ: Տարբեր վայրերում անցկացվում են նաև ապակենտրոնացված միջոցառումներ: Նախատեսված է նաև «Երեք մարմինների խնդիրը» գրքի շնորհանդեսը: Հոկտեմբերի 1-ի երեկոյան կազմակերպվել էր «Բարև, ես եմ» կինոնկարի ցուցադրությունը:

Լիլիթ Մարգարյանը նշեց, որ ձգտելով «Գիտության շաբաթ. Հայաստան»-ը դարձնել ամենամյա սպասված միջոցառումներից մեկը՝ կազմակերպիչները փորձում են հարուստ բովանդակություն հաղորդել դրան, անդրադառնալ հետաքրքիր ու կարևոր թեմաների, ինչպես նաև լուծում ակնկալող խնդիրների:

«Նախորդ տարի առաջին անգամ անցկացված միջոցառման համար ընտրել էինք «Մոտեցնել գիտությունը հասարակությանը» կարգախոսը: Այս անգամ մեր կարգախոսն է «Զարգացնել գիտությամբ»: Ցանկանում ենք ընդգծել պետության զարգացման գործում գիտության դերի կարևորությունը՝ անկյունաքարային նշանակությունը: Հաճախ այդ դերն առաջին հայացքից չի նշմարվում, և մարդիկ չեն պատկերացնում, որ Հայաստանում առկա որոշ խնդիրների և մարտահրավերների լուծումը իրականում կախված է գիտական, ճարտարագիտական և մարդկային կապիտալի մրցունակության աստիճանից: Ըստ այդմ, փորձում ենք ստանալ այդ հարցի պատասխանը և այն ներկայացնել հասարակությանը»,- ասաց մեր զրուցակիցը:

Նա գտնում է, որ սահմանված նպատակին ծառայելու համար այս միջոցառումը պետք է դառնա ինստիտուցիոնալ հարթակ և լինի շարունակական:

«Գիտության դերն ու նշանակությունը կարելի է ընդգծել, արտահայտել տարբեր գործիքակազմի միջոցով, որի ընտրությունը կախված է նրանից, թե թիրախային ինչ լսարանների է ուղղված: Մարդիկ անմիջականորեն շփվում են գիտնականների հետ, որոնք բացատրում և ցույց են տալիս, թե գիտականորեն ինչպես կարելի է լուծել այս կամ այն խնդիրը»,- նշեց Լիլիթ Մարգարյանը:

Նա տեղեկացրեց նաև, որ այս տարի միջոցառման այցելուներն անհամեմատ շատ են: Ուրախալի է, որ գերակշռում են երիտասարդները և դպրոցականները:

Հոկտեմբերի 1-ին ավարտվեց «Զարգացնել գիտությամբ» խորագրով թեմատիկ բլոկը: Հոկտեմբերի 2-ից միջոցառումները նվիրված են լինելու մասնագիտական կողմնորոշմանը: Առանցքային շեշտադրումն է՝ ինչո՞ւ դառնալ գիտնական ու ճարտարագետ: Երևանի Ազատության հրապարակում, որտեղ ընթանում է միջոցառումը, տաղավարները զբաղեցնելու են արդեն Հայաստանի տարբեր համալսարանների և մագիստրոսական բաժիններ ունեցող մյուս կրթական հաստատությունները: Իսկ հոկտեմբերի 3-4-ին միջոցառումները վերաբերելու են գիտական ֆանտաստիկային:

Զանգեզուրի պղնձամոլիբդենային կոմբինատի տաղավարը ներկայացնող երկրաբան Արման Հայրապետյանը պատմեց, թե ինչ է ներկայացված իրենց տաղավարում:

«Սրանք Քաջարանի հանքավայրից բերված կեռների նմուշներ են: Նաև ներկայացված է հորատաձողի փոքր մակետ՝ հորագլխիկով: Դրա միջոցով է ստացվում հորատահանուկը, որը երկրաբանները փաստագրում են, որոշում են դրա կազմը, առանձնացնում նմուշարկման ինտերվալները: Այնուհետև, կեռնի կեսը ուղարկվում է լաբորատորիա, որտեղ որոշվում է, թե այն ի՞նչ չափաբաժնով և ի՞նչ մետաղներ է պարունակում: Հետո, արդեն եռաչափ ծրագրերի միջոցով կատարվում է մոդելավորում, ընդգծվում է հանքայնացած մարմինը, և կարողանում ենք հասկանալ, թե որքան է տվյալ վայրում մետաղների միջին պարունակությունը և որ  խորություններում են դրանք գտնվում: Միայն դրանից հետո են ֆինանսիստները, տնտեսագետները որոշում հանքավայրի շահագործման նպատակահարմարությունը»,- պատմեց նա՝ ներկայացնելով նաև, իր խոսքով, Հայաստանում եզակի մի սարքավորում՝ ակուստիկ զոնդը, որի արձակած ձայնային ալիքները թույլ են տալիս բաց հորատանցքում տեսնել բնական ճաքերը, նրանց հզորությունը և տեղադիրքը տարածության մեջ: