3 րոպեի ընթերցում
Դեղագիտությունը բժշկագիտության ամենաարագ զարգացող ոլորտներից է, սակայն դեղորայքի ոչ ճիշտ օգտագործման պատճառով մարդկությունը կանգնած է նոր մարտահրավերների առաջ։ Դեղագետների միջազգային օրվա առթիվ «Արմենպրես»-ի «Հարց բժշկին» նախագծի շրջանակում ԵՊԲՀ կլինիկական ֆարմակոլոգիայի ամբիոնի վարիչ, բժշկական գիտությունների դոկտոր, պրոֆեսոր Նարինե Միրզոյանի հետ զրուցել ենք դեղորայքի ճիշտ կիրառման, ինքնաբուժման սահմանների և հակաբիոտիկների չարաշահման վտանգների մասին։
«Բժշկագիտության նպատակը կանխարգելելն ու բուժելն է, որն այսօր հնարավոր չէ առանց դեղերի։ Նոր դեղերի ստեղծումը, թիրախների բացահայտումը և դրանց վրա ազդելու եղանակները դեղագիտությունը դարձնում են անփոխարինելի»,- նշում է նա։
Բժիշկը նաև զգուշացրեց ինքնաբուժության վտանգների մասին՝ նշելով, որ կան դեղեր, որոնք կարելի է գնել առանց դեղատոմսի։ Բայց կան նաև այնպիսիք, որոնք անպայման պետք է նշանակվեն բժշկի կողմից. «Ցավոք, մեզ մոտ այս սահմանները խախտվում են, ինչը մեծ վտանգ է ոչ միայն անհատի, այլև ամբողջ առողջապահական համակարգի համար։ Ամենավտանգավորն ինքնաբուժմամբ հակաբիոտիկների կիրառումն է: Տարիների ընթացքում որոշ հակաբիոտիկներ կորցնում են իրենց արդյունավետությունը։ Արդյունքում առաջանում է հակաբիոտիկակայունություն, և կան մանրէներ, որոնք չեն ենթարկվում որևէ դեղի ազդեցության։ Ցավոք, սա գլոբալ խնդիր է»,- նշեց մասնագետը:
Անդրադառնալով ցավազրկողների ու վիտամինների չկարգավորված օգտագործման վտանգներին՝ Նարինե Միրզոյանն ընդգծեց՝ ցավը պարզապես ախտանիշ չէ։ Շատ դեպքերում այն հուշում է լուրջ առողջական խնդրի մասին.
«Ցավը պարզապես ընկճելով՝ մենք կարող ենք բաց թողնել հիվանդության ճիշտ բուժման հնարավորությունը։ Վիտամինների դեպքում ևս պետք է զգույշ լինել, դրանք պետք է ստանալ հիմնականում բնական սննդակարգից, իսկ դեղորայքային հավելումները կիրառել միայն բժշկի խորհրդով»,- մանրամասնում է Միրզոյանը։
Խոսելով ամենատարածված սխալների մասին՝ մասնագետն ընդգծեց, որ շատերը լսում են ծանոթների կամ հարևանների խորհուրդները՝ առանց բժշկի այցելելու, ինչը կարող է վտանգավոր լինել։ Դեղերը պետք է ընտրվեն անհատական մոտեցմամբ՝ հաշվի առնելով հիվանդության ընթացքը, տարիքը, առանձնահատկությունները:
«Ինքնաբուժումը պետք է ունենա իր սահմանները։ Հակաբիոտիկները երբեք չպետք է կիրառվեն առանց բժշկի դեղատոմսի։ Իսկ բոլոր դեղերը պետք է ընդունել միայն ջրով և խստորեն հետևել ներդիրի ցուցումներին»,-ամփոփեց մասնագետը։
Դեղագիտության մասին մի շարք հարցերի պատասխանները ստանալու և մասնագետի կողմից առաջարկվող լուծումներին ավելի մանրամասն ծանոթանալու համար առաջարկում ենք լսել փոդքաստը:
Լսեք նաև այլ թեմաներով Podcast-ները: