2 րոպեի ընթերցում
Պեկինը հարգում է միջուկային էներգիան խաղաղ նպատակներով օգտագործելու՝ Իրանի իրավունքը և աջակցում է Իրանին պետական ինքնիշխանությունը պաշտպանելու հարցում, հայտարարել է Չինաստանի նախագահ Սի Ծինփինը Պեկինում իր իրանցի գործընկեր Մասուդ Փեզեշքիանի հետ հանդիպման ժամանակ: «Արմենպրես»-ի փոխանցմամբ՝ այս մասին հաղորդում է Չինաստանի կենտրոնական հեռուստատեսությունը։
«Չինաստանը գնահատում է այն, որ Իրանը բազմիցս հաստատել է միջուկային զենք չմշակելու իր պարտավորությունը, և հարգում է միջուկային էներգիան խաղաղ նպատակներով օգտագործելու՝ Իրանի իրավունքը», - ասել է Չինաստանի ղեկավարը։
Սի Ծինփինն ընդգծել է, որ Պեկինն «աջակցում է Իրանին իր պետական ինքնիշխանությունը, տարածքային ամբողջականությունը և ազգային արժանապատվությունը պաշտպանելու, ինչպես նաև քաղաքական բանակցությունների միջոցով իր օրինական իրավունքներն ու շահերը պաշտպանելու հարցում»։
Չինացի առաջնորդի խոսքով՝ չին-իրանական հարաբերությունները դիմացել են անկայուն միջազգային իրավիճակի փորձությանը և շարունակում են կայուն կերպով ու հաջողությամբ զարգանալ։
«Չինաստանը կշարունակի պաշտպանել արդարությունը, նպաստել Իրանի միջուկային խնդրի լուծմանը՝ հաշվի առնելով բոլոր կողմերի օրինական շահերը, և անդադար ջանքեր կգործադրի Մերձավոր Արևելքում հաստատուն խաղաղության հասնելու համար», - հավելել է Չինաստանի ղեկավարը։