Սահմանային հանքավայրերում գործունեության համար ԱԱԾ, ԱԳՆ, ՊՆ և մաքսային մարմնի համաձայնությունները կդառնան պարտադիր
2 րոպեի ընթերցում
Սահմանային շերտում ուսումնասիրություն կամ արդյունահանում իրականացնելու դիմումներին կից պարտադիր կդառնան ԱԱԾ, ԱԳՆ, ՊՆ, իսկ մաքսային հսկողության գոտում՝ նաև մաքսային մարմնի համաձայնությունները։
«Արմենպրես»-ի հաղորդմամբ՝ այս մասին ԱԺ տնտեսական հարցերի մշտական հանձնաժողովի նիստում ասաց Տարածքային կառավարման և ենթակառուցվածքների նախարարի տեղակալ Ասատուր Վարդանյանը՝ ներկայացնելով «ՀՀ ընդերքի մասին» օրենսգրքի փոփոխությունների նախագիծը, որը խստացնում է սահմանային շերտում և սահմանային գետերի ափերին հանքագործական գործունեության կարգավորումը։
«Ներկայացված նախագծերով առաջարկվում է դիմումին կից ներկայացնել Ազգային անվտանգության ծառայության, արտաքին գործերի և պաշտպանության ոլորտների, իսկ մաքսային գոտիներում նաև մաքսային մարմինների համաձայնությունները»,- ասաց Վարդանյանը։
Նրա խոսքով՝ սահմանվում է լիակատար արգելք սահմանային գետերի հունից ավազ (այդ թվում՝ ավազակոպճային/ավազակոպճագլաքարային խառնուրդ) արդյունահանելու վրա։ Տուգանք՝ 20 մլն դրամ, իսկ կրկնվելու դեպքում՝ ընդերքօգտագործման իրավունքի դադարեցում։
«Գետի հունից ավազի արդյունահանման արգելք է սահմանվել, կրկնելու դեպքում ընդերքօգտագործման իրավունքը ենթակա է դադարեցման»,— ընդգծեց փոխնախարարը։
Փաթեթը միտված է կանխելու գետերի հուների փոփոխության ռիսկերը (այդ թվում՝ Արաքսում) և սահմանային էկոհամակարգերի ու անվտանգային ռիսկերի նվազեցումը։ Կառավարությունը ենթաօրենսդրական ակտերը կսահմանի մինչև 8 ամսում, իսկ գործող ընկերությունները կունենան 90 օր՝ GPS և այլ պահանջներին ամբողջությամբ համապատասխանելու համար։