2 րոպեի ընթերցում
Այս տարի Շիրակի մարզից 1413 շրջանավարտ դիմել է բուհեր, որոնցից 1040-ը կամ 75.1 տոկոսը ընդունվել է։ Ընդունվածներից 261-ը սովորելու է անվճար հիմունքներով։
Ինչպես տեղեկացնում է «Արմենպրես»-ը, այս մասին օգոստոսի 27-ին Գյումրիում անցկացված խորհրդակցության ընթացքում հայտնել է ՀՀ ԿԳՄՍ նախարարի տեղակալ Արաքսիա Սվաջյանը։
Խորհրդակցությանը մասնակցել են Շիրակի մարզի հանրակրթական դպրոցների տնօրեններ, վարչատնտեսական համակարգողներ, Շիրակի մարզպետի տեղակալ Ալբերտ Այվազյանը, ինչպես նաև ոլորտի այլ պատասխանատուներ։
Միջոցառումը մեկնարկել է «Ամսվա լավագույնները» մրցույթում հաղթող ճանաչված մի շարք դպրոցների տնօրենների և մանկավարժների պարգևատրմամբ։ ԿԳՄՍ նախարարության կողմից նրանց հանձնվել են շնորհակալագրեր՝ կրթական ոլորտում ներդրած նշանակալի ավանդի համար։
Խորհրդակցության ընթացքում Արաքսիա Սվաջյանը ներկայացրել է նախորդ տարվա հիմնական ձեռքբերումները, ինչպես նաև անդրադարձել է նոր ուսումնական տարվա մի շարք առանցքային ուղղություններին։
Խոսվել է հանրակրթության պետական նոր չափորոշչի ներդրման, դասագրքերի առկա վիճակի, ուսուցիչների կամավոր ատեստավորման և տարակարգի տրամադրման գործընթացների, նախագծային ուսուցման կազմակերպման, հաստատությունների ֆինանսավորման մոդելի և վերապատրաստումների մասին։
Մինչ խորհրդակցությունը մասնակիցներն այցելել են «Կրթական էքսպո» ցուցահանդես, որտեղ ներկայացվել են Շիրակի մարզի 17 դպրոցների աշակերտների լավագույն նախագծային աշխատանքները՝ տարբեր առարկաներից, որոնք կատարվել են նախորդ ուսումնական տարվա ընթացքում։