2 րոպեի ընթերցում
Հայաստանի նկարիչների միությունում տեղի է ունեցել Արկադի Բաղդասարյանի (Արկո) ծննդյան 80-ամյակին նվիրված «Հետք» խորագրով ցուցահանդեսի բացումը:
«Արմենպրես»-ի փոխանցմամբ՝ այս մասին հաղորդագրություն է տարածել ՀՀ ԿԳՄՍ նախարարությունը։
Ցուցահանդեսին ներկա է եղել ՀՀ կրթության, գիտության, մշակույթի և սպորտի նախարար Ժաննա Անդրեասյանը:
Նախարարը Հայաստանի նկարիչների միության նախագահ Սուրեն Սաֆարյանի ուղեկցությամբ շրջել է ցուցասրահում, ծանոթացել ներկայացված շուրջ 50 աշխատանքներին, որոնք բացահայտում են արվեստագետի ստեղծագործական ամբողջ ճանապարհը՝ վաղ շրջանի գործերից մինչև հասուն շրջանի գլուխգործոցները։ Դիմանկարներից, կոլաժներից, ասամբլյաժներից և քանդակներից բաղկացած այս հավաքածուն թույլ է տալիս դիտարկել Արկադի Բաղդասարյանի արվեստի զարգացումը բոլոր շերտերով՝ ակադեմիականությունից մինչև անսահման ազատություն։
Հայկական աբստրակցիոնիզմի ներկայացուցիչ Արկադի Բաղդասարյանի 80-ամյակին նվիրված «Հետք» ցուցահանդեսը հնարավորություն է ընձեռում ոչ միայն հիանալու նրա բազմազան ստեղծագործություններով, այլև վերաիմաստավորելու նկարչի դերը ժամանակակից արվեստի պատմության մեջ։ Նա դիտողին հրավիրում է մտածելու արվեստի և կյանքի միջև եղած բարդ փոխհարաբերությունների, հիշողության և ժառանգության մասին։
Ցուցահանդեսը մի կողմից արտացոլում է Արկադի Բաղդասարյանի անցած ստեղծագործական ճանապարհը՝ որպես աբստրակտ արվեստի առաջամարտիկի մշակութային «հետքը», մյուս կողմից՝ խորհրդանշում այն հոգևոր և ստեղծագործական ժառանգությունը, որը նա փոխանցել է հաջորդ սերունդներին։