2 րոպեի ընթերցում
Թուրքիայի նախագահ Ռեջեփ Թայիփ Էրդողանը Հաղորդակցության վարչության ղեկավար է նշանակել փոխարտգործնախարար Բուրհանեթթին Դուրանին, ով այս պաշտոնում կփոխարինի Ֆահրեթթին Ալթունին։ «Արմենպրես»-ի հաղորդմամբ, որոշումը հրապարակվել է Թուրքիայի պաշտոնաթերթում։
Էրդողանի կողմից Ֆահրեթթին Ալթունի նշանակումը տեղի էր ունեցել 2018 թվականին՝ ղեկավարելու նոր ստեղծվող կառույցը, որն ունի շուրջ 1500 աշխատակից ինչպես Թուրքիայում, այնպես էլ դրա սահմաններից դուրս։
Reuters-ը նշում է, որ Հաղորդակցության վարչության գործունեության հիմնական նպատակը եղել է ավելի լսելի դարձնել թուրքական կառավարության ձայնն ամբողջ աշխարհում, ուշի ուշով հետևել տեղական մեդիային՝ ջանալով հայտնաբերել ապատեղեկատվությունը։ Իսկ գործնականում այս քաղաքականությունն արտահայտվել է ընդդիմադիր լրատվամիջոցներին ու սոցիալական ցանցերում արվող քննադատական գրառումները գրաքննելով։
Տարբեր զեկույցների համաձայն՝ Թուրքիայի հիմնական լրատվամիջոցների 90 տոկոսը կառավարության հետ սերտ դիրքորոշում ունեցող ԶԼՄ-ներ են, ինչը օգնում է Էրդողանին շարունակել ավելի քան 20 տարի իր ձեռքում պահել երկրի իշխանությունը։
Հաղորդակցության վարչության նոր ղեկավար Դուրանը ԱԳ փոխնախախարի պաշտոնում գերազանցապես աշխատել է Աֆրիկայի երկրների հետ հարաբերությունների վրա։ Իսկ մինչ այդ երկար տարիներ ղեկավարել է Թուրքիայի կարևորագույն հետազոտական կենտրոններից մեկը՝ «Քաղաքական, տնտեսական և հասարակագիտական հետազոտությունների հիմնադրամը» (SETA): Թեպետ այս հիմնադրամը դիրքավորում է իրեն որպես անկախ և անկողմնակալ թինք-թանք, սակայն տարիների ընթացքում շատ ուսումնասիրություններ ցույց են տվել դրա սերտ կապերը երկրի իշխող շրջանակների հետ։
Իսկ Ֆահրեթթին Ալթունը այսուհետ նախագահի որոշմամբ գլխավորելու է Թուրքիայի մարդու իրավունքների և հավասարության խորհուրդը։