Կալիֆոռնիայում յոթ մարդ անհետ կորած է համարվում պահեստում տեղի ունեցած պայթյունից հետո
1 րոպեի ընթերցում
ԱՄՆ Կալիֆոռնիայի նահանգի Յոլոյի շրջանում առնվազն յոթ մարդ անհետ կորած է համարվում հրավառությունների պահեստում տեղի ունեցած պայթյունից և հրդեհից հետո: Ինչպես «Արմենպրես»-ը տեղեկանում է ՏԱՍՍ գործակալությունից, այդ մասին ասվում է շրջանի վարչակազմի և Կալիֆոռնիայի անտառտնտեսության և հրշեջ պահպանության գերատեսչության տարածաշրջանային ստորաբաժանման համատեղ մամուլի հաղորդագրության մեջ:
Պատահարի վայրում կրակը դեռևս լիովին չի մարվել, ուստի տեղի բնակիչների տարհանման հրամանները մնում են ուժի մեջ: «Յոթ մարդ մնում է անհետ կորած: Փրկարարներն ու քննիչներն աշխատում են օբյեկտի սեփականատիրոջ հետ՝ այդ անձանց գտնվելու վայրը պարզելու համար», - ասվում է փաստաթղթում:
Անտառտնտեսության և հրշեջ պահպանության գերատեսչությունն առանձին ընդգծում է, որ նման միջադեպերը «տեղի են ունենում շատ հազվադեպ, քանի որ այդ օբյեկտները պարտավոր են հետևել ոչ միայն Կալիֆոռնիայի, այլև դաշնային օրենսդրությամբ սահմանված խիստ պահանջներին»:
Հուժկու պայթյունը, որի հետևանքով սկսվել է հրդեհ, Յոլոյի շրջանում տեղի է ունեցել հուլիսի 2-ին հրավառությունների պահեստում: Պատահարի պատճառներն առայժմ պարզված չեն: