Պտտահողմն Ապարանում մեծ ավերածություններ է առաջացրել. համայնքապետարանը, Արագածոտնի մարզպետարանը և փրկարարներն աշխատում են տեղում
1 րոպեի ընթերցում
Ապարանում պտտահողմի հետևանքով շենքեր են վնասվել. Արագածոտնի մարզպետը համայնքապետի հետ տեղում է, այս պահին ուսումնասիրվում է վնասի չափը։ «Արմենպրես»-ի հաղորդմամբ՝ այս մասին «Ֆեյսբուք»-ի իր էջում տեղեկացրել է ՀՀ Արագածոտնի մարզպետի աշխատակազմ։
«Ապարանը հոսանքազրկված է, անվտանգության նկատառումով դադարեցվել է նաև գազամատակարարումը։
Տեղում այս պահին աշխատում է ՆԳՆ փրկարար ծառայությունը, մարզպետի գլխավորությամբ աշխատում են նաև Արագածոտնի մարզպետի աշխատակազմի համապատասխան ստորաբաժանումների մասնագետները։
Լրացուցիչ տեղեկատվությամբ հանդես կգանք առաջիկայում»,- հայտնում են աշխատակազմից։
Ապարանի համայնքապետարան էլ տեղեկացնում է, որ ժամեր առաջ տեղի ունեցած պտտահողմը մեծ ավերածություններ է առաջացրել Ապարանում` վնասելով շենքեր, տանիքներ, ծառեր և ենթակառուցվածքներ։ «Իրավիճակին օպերատիվ արձագանքում է Ապարան համայնքի ղեկավարությունը՝ մասնակցելով վնասների գնահատմանն ու վերականգնողական աշխատանքների կազմակերպմանը։
Ներկայումս տեղում աշխատում են համապատասխան ծառայությունները՝ ապահովելու բնակչության անվտանգությունը:
Համայնքապետարանը կոչ է անում քաղաքացիներին պահպանել հանգստություն»,- ասվում է գրառման մեջ: