Պուտինը Թրամփին հայտնել է Իրանի հետ հարաբերությունների կարգավորմանը նպաստելու պատրաստակամության մասին. Պեսկով
1 րոպեի ընթերցում
Ռուսաստանի նախագահ Վլադիմիր Պուտինը պատրաստակամություն է հայտնել օգնելու Իրանի միջուկային ծրագրի շուրջ ստեղծված իրավիճակի կարգավորմանը: Ինչպես «Արմենպրես»-ը տեղեկանում է ՏԱՍՍ գործակալությունից, այդ մասին հայտնել է ՌԴ նախագահի մամուլի քարտուղար Դմիտրի Պեսկովը՝ մեկնաբանելով ԱՄՆ նախագահ Դոնալդ Թրամփի հետ Ռուսաստանի ղեկավարի զրույցը:
Նրա խոսքով՝ Մոսկվան Թեհրանի հետ կառուցել է ազնիվ և գործընկերային հարաբերություններ, և Պուտինը նշել է, որ Ռուսաստանը պատրաստ է օգտագործելու փոխգործակցության այդ մակարդակը՝ իրանական միջուկային հարցի կարգավորման բանակցային գործընթացում իր ավանդը ներդնելու համար:
Թրամփը հունիսի 4-ին Պուտինի հետ հեռախոսազրույցում հայտարարել է Ռուսաստանի օգնության անհրաժեշտության մասին իրանական միջուկային ծրագրի շուրջ ստեղծված իրավիճակի հարցում:
Մայիսի 23-ին Հռոմում կայացել է Իրանի և ԱՄՆ-ի միջև բանակցությունների հինգերորդ փուլը՝ իրանական միջուկային ծրագրի շուրջ առկա տարաձայնությունների կարգավորման համար: Իրանի պատվիրակությունը գլխավորում էր արտգործնախարար Աբբաս Արաղչին, ամերիկյան պատվիրակությունը՝ նախագահի հատուկ բանագնաց Սթիվեն Ուիթքոֆը: