1 րոպեի ընթերցում
Թեհրանում Ադրբեջանի դեսպանատան վրա 2023 թ. հունվարին հարձակում գործած անձն առավոտյան մահապատժի է ենթարկվել։ «Արմենպրես»-ի փոխանցմամբ՝ այս մասին հաղորդում է Mehr լրատվական գործակալությունը։
Յասին Հուսեյնզադեն Ադրբեջանի դեսպանատուն էր ներխուժել Կալաշնիկով ինքնաձիգով՝ և կրակ բացել, որի հետևանքով զոհվել էր դիվանագիտական առաքելության անվտանգության ծառայության ղեկավարը, անվտանգության երկու աշխատակից վիրավորվել էին։
Ըստ իրանցի իրավապահների՝ Յասին Հուսեյնզադեն Ադրբեջանի դեսպանատան վրա հարձակում էր գործել անձնական դրդապատճառներից ելնելով։ Նա ավելի ուշ բացատրել էր, որ իր կինը մտել էր Թեհրանում Ադրբեջանի դեսպանատուն, որից հետո տուն չէր եկել։ Հուսեյնզադեն կարծել էր, թե կինը դեռ ներսում է և չի ցանկանում հանդիպել իր հետ, այդ պատճառով որոշել էր ինքնաձիգով ներխուժել դեսպանատուն։
Դատավարության ժամանակ դատախազը պահանջել էր ամենախիստ պատիժը սահմանել մեղադրյալի նկատմամբ։