1 րոպեի ընթերցում
Բրազիլիայի նախագահ Լուիս Ինասիու Լուլա դա Սիլվան հայտարարել է, որ մտադիր է անձամբ հորդորել Ռուսաստանի նախագահ Վլադիմիր Պուտինին Թուրքիայում մայիսի 15-ին հանդիպել Ուկրաինայի նախագահ Վոլոդիմիր Զելենսկիի հետ։ «Արմենպրես»-ի փոխանցմամբ՝ այս մասին գրում է Le Figaro-ն։
«Ես կփորձեմ խոսել Պուտինի հետ: Ինձ համար դժվար չի լինի նրան ասել՝ լսեք, իմ ընկեր Պուտին, գնացեք Ստամբուլ՝ բանակցությունների», - ասել է նա Պեկինում կայացած մամուլի ասուլիսում:
Պարբերականը նշում է, որ Բրազիլիայի նախագահը պլանավորում է Չինաստանից Բրազիլիա գնալու ճանապարհին կանգառ կատարել Մոսկվայում։
Մայիսի 15-ին Ստամբուլում նախատեսված բանակցություններն առաջին ուղղակի քննարկումները կլինեն Ուկրաինայի և Ռուսաստանի միջև 2022 թ. գարնանից ի վեր։
Չինաստանի նախագահ Սի Ծինփինը և Բրազիլիայի նախագահ Լուլա դա Սիլվան մայիսի 13-ին համատեղ հայտարարություն էին տարածել՝ նշելով, որ ռուս-ուկրաինական հակամարտությանը վերջ դնելու միակ ճանապարհն ուղիղ երկխոսությունն է։