Հանրապետությունում ջրծաղիկի դեմ պատվաստման գործընթացը շարունակվում է. պատվաստվել է 1900 երեխա
4 րոպեի ընթերցում
Ջրծաղիկի դեմ պատվաստման գործընթացին ուղղված աշխատանքները շարունակվում են ըստ պլանավորածի. հանրապետության ամբողջ տարածքում արդեն պատվաստվել է 1900 երեխա։
«Արմենպրես»-ի հետ զրույցում այս մասին ասաց Հիվանդությունների վերահսկման և կանխարգելման ազգային կենտրոնի իմունականխարգելման և կառավարելի վարակիչ հիվանդությունների համաճարակաբանության վարչության պետ Սվետլանա Գրիգորյանը՝ նշելով, որ պատվաստանյութը բավական սպասված էր հանրության կողմից. գործընթացը ընթանում է ըստ պլանավորածի և առանց որևէ արտառոց դեպքերի:
Մասնագետի խոսքով՝ պատվաստումները մեկնարկել են 2025 թվականի հունվարի 31-ից: Պատվաստման ենթակա են 2023 թվականի նոյեմբերի 1-ից հետո ծնված ու 12 ամսականը լրացած երեխաները։ Նախատեսվում է, որ 2027 թվականից այս երեխաները կստանան իրենց 2-րդ դեղաչափը: Երկու դեղաչափը բավարար է՝ կյանքի ընթացքում ջրծաղիկ հիվանդությունից պաշտպանված լինելու համար:
Գրիգորյանը նշեց, որ Հայաստանում 2025 թվականի հունվար ամսին գրանցվել է ջրծաղիկի 2363 դեպք, իսկ 2024 թվականի ընթացքում գրանցվել է 22 հազար 11 դեպք:
«Ջրծաղիկը վիրուսային հիվանդություն է և բնորոշվում է ինչպես սեզոնայնությամբ, այնպես էլ պարբերականությամբ: Սեզոնայնությունը հիմնականում արտահայտվում է ձմռան և գարնան ամիսներին, իսկ պարբերականությունը տարիների ընթացքում հիվանդության բարձրացումների և իջեցման հատվածն է: Յուրաքանչյուր 2-ից 5 տարին մեկ անգամ ունենում ենք պարբերական բարձրացման ժամանակահատված: Նշեմ, որ 2024 թվականը ջրծաղիկի պարբերական բարձրացման ժամանակահատվածն էր, այդ իսկ պատճառով հանրապետությունում գրանցվել է 22 հազար 11 դեպք»,- նշեց Սվետլանա Գրիգորյանը:
Ըստ մասնագետի՝ Հայաստանում յուրաքանչյուր տարի ջրծաղիկի մոտ 15-16 հազար դեպք է գրանցվում: Քանի որ 2024 թվականը պարբերական բարձրացման ժամանակահատվածն էր, այդ տարում որոշակի ակտիվություն է դրսևորվել, սակայն 2025-26 թվականներին կանխատեսվում են որոշակի նվազման միտումներ՝ պայմանավորված համաճարակաբանական առանձնահատկություններով:
«Նշեմ, որ ջրծաղիկը հանրային առողջապահական հիմնախնդիր է ինչպես ամբողջ աշխարհում, այնպես էլ Հայաստանում, և այս համատեքստում է, որ առողջապահության նախարարությունը որոշում է կայացրել պատվաստումների ազգային օրացույցում ներդնել ջրծաղիկի դեմ պատվաստումները, որպեսզի ևս մեկ հիվանդություն դառնա կառավարելի պատվաստումների միջոցով»,-ասաց վարչության պետը:
Սվետլանա Գրիգորյանը նշեց՝ միջազգային փորձը ցույց է տալիս, որ ջրծաղիկի դեմ պատվաստանյութը բավականին արդյունավետ է։ Դրա կիրառման ցուցումները նույնն են, ինչ մյուս պատվաստանյութերի դեպքում է։ Հայաստանի բոլոր պատվաստում իրականացնող բուժհաստատությունները ապահովված են պատվաստանյութով և սահմանված կարգով իրականացնում են պատվաստումների պլանավորում:
ՀՀ-ում ջրծաղիկ հիվանդությունը հանրային առողջապահական հիմնախնդիր է, այս համատեքստում դեռևս 2022թ նախաձեռնվել է ջրծաղիկի դեմ պատվաստումների ներդրման գործընթաց։ Հիմք ընդունելով ջրծաղիկի դեմ պատվաստումների կիրառման միջազգային փորձը, պատվաստումների արդյունավետության և անվտանգության, ինչպես նաև ծախսարդյունավետության տվյալները՝ ՀՀ ԱՆ-ի կողմից առաջարկվել է ՀՀ կառավարությանը ջրծաղիկի դեմ պատվաստումները ներառել պատվաստումների ազգային օրացույցում։