Գորիս-Շինուհայր ավտոճանապարհին արգելափակումից դուրս է բերվել 17 բեռնատար և 36 մարդատար ավտոմեքենա. ճանապարհը երթևեկելի է
1 րոպեի ընթերցում
Սյունիքի մարզային փրկարարական վարչության օպերատիվ խումբը փետրվարի 26-ին, ժամը 11:32-ին շրջայցի ընթացքում նկատել է, որ Գորիս-Շինուհայր ավտոճանապարհի 19-րդ կմ-ին՝ ճոպանուղու մոտակայքում, խցանում է առաջացել. անհրաժեշտ է փրկարարների օգնությունը:
Ինչպես «Արմենպրես»-ին տեղեկացրին ՀՀ ներքին գործերի նախարարության փրկարար ծառայությունից, դեպքի վայր են մեկնել ՆԳՆ ՓԾ մարզային փրկարարական վարչության հրշեջ-փրկարարական ջոկատի և Շինուհայրի հենակետի մեկական մարտական հաշվարկ:
Փրկարարները քարշակման եղանակով արգելափակումից դուրս են բերել 17 բեռնատար և 36 մարդատար ավտոմեքենա, Շինուհայրի առաջնային օգնության հենակետում օգնություն են ցուցաբերել թվով 16, իսկ ճանապարհի խցանված հատվածում՝ 17 քաղաքացու։
Ըստ աղբյուրի՝ փրկարարների և պարեկների համատեղ օգնությամբ խցանումից դուրս է բերվել 105 բեռնատար, որոնք շարունակել են երթևեկությունը: Ճանապարհը դարձել է երկկողմանի երթևեկելի: