Կիևը տվյալներ է հայտնել Կուրսկում հյուսիսկորեական ուժերի կորուստների մասին

ԵՐԵՎԱՆ, 16 ԴԵԿՏԵՄԲԵՐԻ, ԱՐՄԵՆՊՐԵՍ։ Ուկրաինան հայտարարել է, որ Ռուսաստանի կողմից կռվող հյուսիսկորեական զինվորներից 30-ը զոհվել կամ վիրավորվել են դեկտեմբերի 14-15-ին Կուրսկի մարզում ընթացող մարտերի ժամանակ։ «Արմենպրես»-ի փոխանցմամբ՝ այս մասին հաղորդում է Reuters գործակալությունը՝ վկայակոչելով ուկրաինական հետախուզական ծառայության հայտարարությունը։

Նշվում է, որ Ուկրաինայի ռազմական գերատեսչության հետախուզական ծառայության՝ դեկտեմբերի 16-ի վերոնշյալ հայտարարությունից օրեր առաջ Ուկրաինայի նախագահ Վոլոդիմիր Զելենսկին հայտարարել էր, որ Կուրսկ մտած ուկրաինացի զինվորների դեմ հարձակումներ իրականացնելու համար Ռուսաստանն առաջին անգամ օգտագործում է մեծ թվով հյուսիսկորեացի զինվորների։ Ուկրաինական կողմը նշել է, որ զոհեր և տուժածներ են եղել Պլեխովո, Վորոժբա և Մարտինովկա գյուղերի մերձակայքում։ 

Կրեմլը հրաժարվել է մեկնաբանել ուկրաինական կողմի այս պնդումները՝ ասելով, որ այդ հարցը պետք է ուղղել Ռուսաստանի պաշտպանության նախարարությանը, որն այս թեմայի շուրջ մեկնաբանություն չի արել։

Ռուսաստանը ո՛չ հերքել, ո՛չ հաստատել է հյուսիսկորեացի զինվորների մասնակցությունը մարտերին։ Փհենյանն ավելի վաղ իր զորքերի տեղակայման մասին լուրերը որակել էր որպես «կեղծ», սակայն հյուսիսկորեացի պաշտոնյաներից մեկը հայտնել էր, որ նման տեղայակումը կլիներ օրինական։

Ըստ Կիևի գնահատումների՝ Կուրսկի մարզում տեղակայվել է 11 000 հյուսիսկորեացի զինվոր։