Արդարադատության նախարարը կիսում է իշխող քաղաքական ուժի դիրքորոշումը՝ կապված «իրական Հայաստան» հայեցակարգի հետ
1 րոպեի ընթերցում
ԵՐԵՎԱՆ, 7 ՆՈՅԵՄԲԵՐԻ, ԱՐՄԵՆՊՐԵՍ: Արդարադատության նորանշանակ նախարար Սրբուհի Գալյանն ամբողջությամբ կիսում է իշխող քաղաքական ուժի դիրքորոշումը՝ կապված «իրական Հայաստան» հայեցակարգի հետ:
«Արմենպրես»-ի հաղորդմամբ՝ Գալյանն այս մասին ասաց կառավարության նիստից հետո լրագրողների հետ զրույցում:
«Ես ամբողջովին կիսում եմ իշխող քաղաքական ուժի դիրքորոշումը՝ «իրական Հայաստան»-ի գաղափարախոսության հետ կապված: Եվ ստանձնել եմ պարտականություն, ստանձնել եմ պատասխանատվություն իրականացնել ողջ գործընթացի իրավական ապահովումը»,-ասաց Գալյանը:
Նախարարն ասաց, որ դեռ չի հասցրել ծանոթանալ Հայաստանի և Ադրբեջանի միջև խաղաղության պայմանագրի նախագծի տեքստին, քանի որ ընդամենը 3 օր է, ինչ նախարար է, սակայն ստանձնել է պատասխանատվություն՝ նաև ապահովելու խաղաղության ողջ գործընթացի իրավական ապահովումը:
«Իրական Հայաստան»-ի գաղափարախոսության մասին պարբերաբար իր ելույթներում խոսում է Հայաստանի վարչապետ Նիկոլ Փաշինյանը: Ըստ նրա՝ հայ ժողովուրդը շատ վաղուց է կատարել իր ընտրությունը «իրական Հայաստանի» և «պատմական Հայաստանի» միջև՝ հօգուտ «իրական Հայաստանի»: