2 րոպեի ընթերցում
ԵՐԵՎԱՆ, 11 ՀՈԿՏԵՄԲԵՐԻ, ԱՐՄԵՆՊՐԵՍ։ Սերբիան և Թուրքիան կխորացնեն համագործակցությունը պաշտպանական արդյունաբերության ոլորտում և կձևավորեն ռազմական արդյունաբերության համագործակցության աշխատանքային խումբ։ Ինչպես տեղեկացնում է «Արմենպրես»-ը՝ վկայակոչելով «ՌԻԱ Նովոստի»-ն, այդ մասին հայտարարել է Սերբիայի նախագահ Ալեքսանդր Վուչիչը։
Թուրքիայի նախագահ Ռեջեփ Էրդողանն այցով ժամանել է Սերբիա, նրան օդանավակայանում հանդիսավոր պայմաններում դիմավորել է սերբական պետության ղեկավարը։ «Սերբիայի պալատ» կառավարական համալիրի դիմաց կայացել է թուրքական պատվիրակության պաշտոնական դիմավորումը։ Արարողությունից հետո Վուչիչն ու Էրդողանը գնացել են դեմ առ դեմ բանակցությունների։
«Մեր համաձայնությունը, ցանկությունն ու հանձնարարականը, որ նախագահ Էրդողանը տվել է իր ժողովրդին, և այն, ինչ ես խնդրել եմ կառավարությունից մեր ժողովրդի համար անելու նպատակով, ավելի սերտ հարաբերություններ և համագործակցություն հաստատելն է մեր ռազմական, պաշտպանական արդյունաբերության շրջանակներում։ Մենք կառավարությունից և երկու երկրներից կարևոր մարդկանց ենք ընտրել և փորձագետներ, ովքեր արագ կստեղծեն թիմ, որը կաշխատի այս հարցի շուրջ մանրակրկիտ ձևով և մոտակա ժամանակաշրջանում»,- ասել է Վուչիչը։
Նրա խոսքով՝ առաջիկա տարիներին Բելգրադի և Անկարայի նպատակն է հասնել 5 միլիարդ եվրոյի տարեկան ապրանքաշրջանառության, այս տարվա առաջին ութ ամիսներին այդ գումարը հասել է 1,92 միլիարդ եվրոյի, իսկ ակնկալվում է, որ այն կհասնի 2,6 միլիարդ եվրոյի 2024 թվականի վերջին։
Վուչիչը հավելել է, որ Էրդողանի այցը նշանակալի քայլ է երկկողմ կապերի ամրապնդման ուղղությամբ, որոնք մարտահրավերների ժամանակ ամրապնդում են ապագա երկխոսության և համագործակցության հարթակը` որպես Բալկաններում խաղաղության և կայունության հիմնական գործոններ: Թուրքիայի նախագահի այցի շրջանակներում ստորագրվել են նաև համագործակցության 11 հուշագրեր տարբեր նախարարությունների և գերատեսչությունների միջև, նախատեսվում է նաև թուրքական և սերբական ընկերությունների գործարար համաժողով։