2025 թվականին նախատեսվում է ավելի քան 3 տրիլիոն դրամ ծախս. Կառավարությունը հաստատեց պետբյուջեի նախագիծը
1 րոպեի ընթերցում
ԵՐԵՎԱՆ, 26 ՍԵՊՏԵՄԲԵՐԻ, ԱՐՄԵՆՊՐԵՍ։ Կառավարությունը հաստատեց «Հայաստանի Հանրապետության 2025 թվականի պետական բյուջեի մասին» Հայաստանի Հանրապետության օրենքի նախագիծը։ «Արմենպրես»-ի հաղորդմամբ՝ ՀՀ կառավարության նիստի ժամանակ նախագիծը ներկայացրեց Ֆինանսների նախարար Վահե Հովհաննիսյանը։
Նրա խոսքով՝ պետական բյուջեի եկամուտները 2025 թվականի բյուջեով նախատեսվում են 2 տրիլիոն 873 միլիարդ դրամ, որից հարկային եկամուտները 2 տրիլիոն 760 միլիարդ դրամ է կազմում։
«Հարկային վարչարարության բարելավման, ստվերի դեմ պայքարի, ինչպես նաև հարկային քաղաքականության միջոցառումների արդյունքում ակնկալվում է ապահովել հարկեր-ՀՆԱ հարաբերակցության բարելավում՝ 2024 թվականի հաստատված բյուջեի համեմատ 0,1, իսկ 2024 թվականի սպասողականի համեմատ՝ 0,7 տոկոս՝ հասնելով Կառավարության ծրագրով սահմանված 25 տոկոս թիրախին։ Պետական բյուջեի ծախսերը նախատեսվում են 3 տրիլիոն 482 միլիարդ դրամ, որից ընթացիկ ծախսերի գծով՝ 2 տրիլիոն 749 միլիոն դրամ, իսկ կապիտալ ծախսերի գծով՝ 733 միլիարդ դրամ։
Կապիտալ ծախսերի կշիռը ՀՆԱ-ում 2025 թվականին կհասնի 6,6 տոկոսի»,- ասաց Հովհաննիսյանը։
