1 րոպեի ընթերցում
ԵՐԵՎԱՆ, 13 ՍԵՊՏԵՄԲԵՐԻ, ԱՐՄԵՆՊՐԵՍ։ Հայաստանի բոլոր մարզերում սեպտեմբերի 14-ին կանցկացվեն կրթամշակութային էքսպոներ։
«Արմենպրես»-ի հաղորդմամբ՝ մամուլի ասուլիսում այս մասին ասաց ԿԳՄՍ նախարար Ժաննա Անդրեասյանը։
«Սեպտեմբերի 14-ին մեր բոլոր մարզերում տեղի կունենան կրթամշակութային էքսպոներ, որտեղ տվյալ մարզի մշակութային հաստատություններն իրենց տաղավարներով ներկայանալու են և ներկայացնելու են իրենց խաղացանկերը, թանգարանները՝ իրենց մոտ հասանելի ցուցադրությունները։ Եվ սա առաջին հերթին լինելու է հնարավորություն ուսուցիչների և ծնողների համար՝ ծանոթանալու առկա մշակութային հնարավորություններին և նաև պլանավորելու ուսումնական գործընթացը ՝ հաշվի առնելով մշակութային հաստատություններ այցելությունները»,- նշեց Անդրեասյանը։
Նախարարն ընդգծեց, որ մշակութային հաստատություն այցը կարևորվում է ոչ միայն որպես ժամանց, այլ նաև որպես կրթական գործընթացի մի մաս։ Նրա խոսքով՝ ուսուցիչների համար տրանսպորտային ծախսերի փոխհատուցման հնարավորություն է ստեղծվել։