2 րոպեի ընթերցում
ԵՐԵՎԱՆ, 29 ՀՈՒԼԻՍԻ, ԱՐՄԵՆՊՐԵՍ։ Ուրուգվայում Հայաստանի Հանրապետության դեսպան Մարիամ Գևորգյանը հուլիսի 26-ին Ուրուգվայի Հանրային կրթության ազգային ադմինիստրացիայի միջազգային հարաբերությունների և համագործակցության տնօրեն Էկտոր Գոնյիի և Լեզվական քաղաքականության տնօրեն Ալդո Ռոդրիգեսի ուղեկցությամբ այցելել է Սալտո նահանգում գործող և «Հայաստանի Հանրապետություն» անվանումը կրող թիվ 16 դպրոց:
«Արմենպրես»-ի հաղորդմամբ՝ այս մասին հայտնում է Ուրուգվայում ՀՀ դեսպանությունը՝ հավելելով, որ դպրոցի տնօրեն Անդրեա Ռոլֆոյի և ուսուցչական կազմի ուղեկցությամբ դեսպան Գևորգյանը շրջայց է կատարել դպրոցում, ծանոթացել ուսումնական գործընթացին և պայմաններին:
Դեսպանությունը հաղորդել է, որ կողմերը կարևորել են դպրոցում հայոց լեզվի և մշակույթի տարածումը՝ այս համատեքստում բարձր գնահատելով հայոց լեզվի դասավանդումը դպրոցում, որը մեկնարկել է նախորդ տարի և կազմակերպվում է Ուրուգվայի Հանրային կրթության ազգային ադմինիստրացիայի և Հայկական բարեգործական ընդհանուր միության (ՀԲԸՄ) համատեղ ջանքերով լույս տեսած «Լույս և Արմեն» դասագրքի միջոցով:
«Դպրոցի աշակերտները հանդիսավոր միջոցառում էին կազմակերպել ՀՀ դեսպանի այցի կապակցությամբ, որի շրջանակներում վերջինիս ողջունեցին հայերենով և կատարեցին հայկական երգեր: Պատրաստակամություն հայտնելով հնարավորինս աջակցել դպրոցի գործունեությանը՝ դեսպան Գևորգյանն աշակերտներին նվիրեց Հայաստանի տեսարժան վայրերի նկարներով փազլներ և վերջիններիս հրավիրեց այց կատարել ՀՀ դեսպանություն», - նշված է դեսպանության տարածած հաղորդագրության մեջ: