Կիևում գտնվող Ժոզեպ Բորելն առավոտը դիմավորել է ապաստարանում

ԵՐԵՎԱՆ, 7 ՓԵՏՐՎԱՐԻ, ԱՐՄԵՆՊՐԵՍ։ Կիևում այցով գտնվող Եվրամիության արտաքին քաղաքական գերատեսչության ղեկավար Ժոզեպ Բորելը գիշերն անցկացրել է ապաստարանում, քանի որ Ուկրաինայի մայրաքաղաքը ենթարկվել է հրթիռային հարձակման։

«Արմենպրես»-ի փոխանցմամբ՝ Բորելն այս մասին հայտնել է X սոցիալական հարթակի իր էջում՝ գրառմանը կցելով լուսանկար։

Starting my morning in the shelter as air alarms are sounding across Kyiv.

This is the daily reality of the brave Ukrainian people, since Russia launched its illegal aggression. pic.twitter.com/Q7tZL5evkd

— Josep Borrell Fontelles (@JosepBorrellF) February 7, 2024

«Իմ առավոտը սկսում եմ ապաստարանում, քանի որ Կիևում հնչում են օդային տագնապի ազդանշաններ», - գրել է Բորելը՝ նշելով, որ Ռուսաստանի հարձակումից ի վեր «այսպիսին է ուկրաինացի խիզախ ժողովրդի ամենօրյա իրականությունը»։

Սա 2022 թ․ փետրվարի 24-ից՝ Ռուսաստանի ծավալած ռազմական գործողությունների մեկնարկից ի վեր Բորելի չորրորդ այցն է Կիև։

Անցյալ շաբաթ Եվրամիության առաջնորդները, ի վերջո համաձայնություն ստանալով նաև Հունգարիայի վարչապետ Վիկտոր Օրբանից, հաստատեցին առաջիկա 4 տարիների ընթացքում ԵՄ բյուջեից Ուկրաինային 50 միլիարդ եվրոյի չափով տնտեսական և ֆինանսական օգնության հատկացումների ծրագիրը։

Սպասվում է, որ օգնության առաջին մասը Կիևը կստանա առաջիկա շաբաթներին։