2 րոպեի ընթերցում
ԵՐԵՎԱՆ, 31 ՀՈՒՆՎԱՐԻ, ԱՐՄԵՆՊՐԵՍ: Հայաստանի բռնցքամարտի հավաքականի գլխավոր մարզիչ Կարեն Աղամալյանի կարծիքով՝ հայ մարզիկներին բարդ տարի է սպասվում:
«2023 թվականից սպասելիքները շատ են: Հայաստանի այս առաջնությանը մասնակցում են ավելի շատ մարզիկներ, քան նախորդ տարիներին էին: Բռնցքամարտիկների համար այս տարին հագեցվածության առումով խիտ է լինելու: Այս առաջնությունից հետո մի քանի շաբաթից կմասնակցենք միջազգային մրցաշարերի, որից հետո միայն կորոշենք, թե որ բռնցքամարտիկները կմասնակցեն Եվրոպական խաղերին, որոնք` աշխարհի առաջնությանը»,-«Արմենպրես»-ի հաղորդմամբ` լրագրողների հետ զրույցում ասաց Աղամալյանը:
Մասնագետի խոսքով` մարզչական շտաբը այժմ լուրջ խնդրի առաջ է կանգնած` աշխարհի առաջնության և Եվրոպական խաղերի միջակայքը մեկ ամիս է, Եվրոպական խաղերը վարկանիշային էին Փարիզի 33-րդ ամառային Օլիմպիական խաղերի համար, իսկ աշխարհի առաջնությունը` ոչ:
Աղամալյանը շեշտեց, որ այս առաջնության մասնակցության իրավունքից ազատվել են Օլիմպիական խաղերի բրոնզե մեդալակիր Հովհաննես Բաչկովը և Եվրոպայի առաջնության բրոնզե մեդալակիր Նարեկ Մանասյանն, ով վնասվածք ունի:
Հայաստանի բռնցքամարտի առաջնությանն այս տարի մասնակցում են 95 բռնցքամարտիկներ: Այն կեզրափակվի փետրվարի 4-ին:
Հետևեք մեզԻնստագրամում