1 րոպեի ընթերցում
ԵՐԵՎԱՆ, 6 ՀՈՒՆՎԱՐԻ, ԱՐՄԵՆՊՐԵՍ։ Կիևին տրամադրվող ԱՄՆ ռազմական օգնության նոր փաթեթի մասին, ներառյալ «Բրեդլի» զրահամեքենաները, կհայտարարվի ուրբաթ օրը: «Արմենպրես»-ի հաղորդմամբ՝ այս մասին հայտնում է «Ինտերֆաքս»-ը՝ հղում անելով Պենտագոնի խոսնակ Պատրիկ Ռայդերի հայտարարությանը:
«Կարող եմ հաստատել, որ Ուկրաինային ռազմական օգնության հաջորդ խմբաքանակի մասին հայտարարությունը սպասվում է ուրբաթ օրը: Ինչպես նշել է Սպիտակ տունը, այդ օգնության շրջանակներում խոսքը վերաբերում է «Բրեդլի» մարտական մեքենաների մատակարարմանը»,- լրագրողներին ասել է նա։
Ավելի վաղ Associated Press-ը, վկայակոչելով ամերիկացի պաշտոնյաներին, հայտնել էր, որ ԱՄՆ-ն Ուկրաինային կուղարկի 2,85 միլիարդ դոլար արժողությամբ ռազմական օգնության նոր փաթեթ, որն առաջին անգամ կներառի մի քանի տասնյակ «Բրեդլի» զրահամեքենաներ: Այս բեռնափոխադրումը կլինի ամենամեծը՝ ռազմական տեխնիկայի փաթեթների շարքում, որոնք Պենտագոնը հատկացրել է Կիևին։