2 րոպեի ընթերցում
ԵՐԵՎԱՆ, 14 ԱՊՐԻԼԻ, ԱՐՄԵՆՊՐԵՍ: Հայաստանի ֆուտբոլի ազգային թիմի նորանշանակ Խոակին Կապարոսն այս օրերին ևս շարունակում է հեռահար աշխատել հավաքականի մյուս մարզիչների հետ և փորձում է գտնել նոր ֆուտբոլիստների:
«Արմենպրես»-ի հաղորդմամբ` Կապարոսի խոսքը փոխանցում է Eurosport-ը: Իսպանացի մասնագետի խոսքով` ինքն ամեն օր կապի մեջ է Հայաստանի ֆուտբոլի ֆեդերացիայի, ինչպես նաև Մ21 տարեկանների գլխավոր մարզիչ Անտոնիո Ֆլորեսի հետ: «Ես իմ օրվա 24 ժամը տալիս եմ Հայաստանի ընտրանուն, և իմ օգնականները ինձ են տալիս այն ֆուտբոլիստների տեսանյութերը, որոնք դեռևս հանդես չեն եկել ընտրանու կազմում: Մինչ Հայաստանի թիմի մարզիչ նշանակվելս արդեն իսկ խոսել էի Մխիթարյանի հետ: Նա Հայաստանի ֆուտբոլիստի իսկական օրինակ է ծառայում: Նա օժտված է նաև մարդկային լավ որակներով»,-ասել է մարզիչը:
Կապարոսին ամենից շատ դուրս է գալիս հայ ֆուտբոլիստների նվիրվածությունը հայրենիքին:
Խոակին Կապարոսը ծնվել է 1955 թվականի հոկտեմբերի 15-ին՝ իսպանական Ուտրետա քաղաքում։ Հայտնի է Բիլբաոյի «Ատլետիկ»-ում, «Դեպորտիվո»-ում և, հատկապես, «Սևիլիա»-ում կատարած մարզչական աշխատանքով: «Սևիլիա» ֆուտբոլային ակումբի ղեկին ամենաշատ հանդիպումներ անցկացրած մարզիչն է: 2019 թվականին Կապարոսը պարգևատրվել է Սևիլիա նահանգի Ոսկե մեդալով։
Պատրաստեց Վարվառա Հայրապետյանը