1 րոպեի ընթերցում
ԵՐԵՎԱՆ, 13 ԱՊՐԻԼԻ, ԱՐՄԵՆՊՐԵՍ: Վատ եղանակային պայմանների պատճառով Չինաստանի Սինցզյան-Ույղուրական ինքնավար շրջանի Ուրումչի քաղաքի միջազգային օդանավակայանում 3900 մարդ է մնացել:
Ինչպես հաղորդում է «Արմենպրես»-ը՝ վկայակոչելով «ՌԻԱ Նովոստի»-ին, այս մասին ասվում է Xinjiang Airport ընկերության հայտարարության մեջ:
14 ժամանող և 14 մեկնող թռիչք չեղարկվել է, 22 մեկնող և 53 ժամանակող թռիչք էլ հետաձգվել է: 30 թռիչք էլ ուղղորդվել է այլ օդանավակայաններ:
«Վերջին տվյալների համաձայն առաջին տերմինալում մնացել է 302 ուղևոր, երկրորդում՝ 1590, երրորդում՝ 1937 մարդ»,- ասվում է հաղորդագրության մեջ:
Օդերևութաբանների տեղեկությունների համաձայն եղանակը կբարելավվի տեղական ժամանակով 20:00-ին (16:00 Երևանի ժամանակով):