368.59
Ֆրանկֆուրտի գրքի տոնավաճառի Հայաստանի տաղավարից ադրբեջանցիները գողության փորձ են կատարել
2 րոպեի ընթերցում
ԵՐԵՎԱՆ, 13 ՀՈԿՏԵՄԲԵՐԻ, ԱՐՄԵՆՊՐԵՍ: Ֆրանկֆուրտի գրքի տոնավաճառի ընթացքում ադրբեջանցիները Հայաստանի տաղավարից գողության փորձ են կատարել: Այս մասին տեղեկացնում է Հայաստանի Հանրապետության մշակույթի նախարարի տեղակալ Ներսես Տեր-Վարդանյանը՝ ֆեյսբուքյան իր էջում կատարված գրառմամբ:
«Արմենպրես»-ի հաղորդմամբ՝ հոկտեմբերի 12-ին տոնավաճառում Հայաստանի տաղավար են մտել երկու ադրբեջանցի, վերցրել գրադարակին ծալված վիճակում դրված Հայաստանի և Արցախի մի քանի քարտեզ և Արցախի թեմայով քաղաքական վանկարկումներով տարել իրենց հետ:
«Մենք կարգի հրավիրելու պահանջով հետևել ենք այս երկուսին մինչև Ադրբեջանի տաղավար, և ես իրենց տաղավարում արդեն ուժով ետ եմ վերցրել քարտեզներն ու վերադարձել: Անմիջապես տաղավար եմ կանչել ցուցահանդեսի անվտանգության աշխատակիցներին և ոստիկանությանը, նաև ցուցահանդեսի փոխտնօրեն Թոբիաս Վոսին և այլ պատասխանատուների: Ոստիկանությունն այս ամենն արձանագրել է և խոստացել միջոցներ ձեռնարկել»,-գրել է Տեր-Վարդանյանը նշելով, որ այդ ամենը լրատվամիջոցների կողմից տեսագրված է եւ առաջիկայում կհրապարակվի:
Այսօր արդեն իրենց լրատվամիջոցներում ադրբեջանցիները գրել են, թե իբր իրենք մտել են ինչ-որ «սեպարատիստների» տաղավար և պատռել քարտեզներ: «Ծանոթ ձեռագիր է: Փաստորեն այս ամենն արվում էր իրենց մամուլի համար: Եվ սա արվում է մի երկրի կողմից, որի տաղավարում քաղաքականությունն ու քարոզչությունը գերակշռում է գրականությանն ու մշակույթին»,-նշում է ՀՀ մշակույթի փոխնախարարը:
Բաժանորդագրվեք մեր ալիքին Telegram-ում