1 րոպեի ընթերցում
ԵՐԵՎԱՆ, 11 ԱՊՐԻԼԻ, ԱՐՄԵՆՊՐԵՍ: Ադրբեջանի նախագահ Իլհամ Ալիևի նկատմամբ դատարանում բողոք ներկայացրած անձի նկատմամբ ճնշումներ են իրականացվում:
Այս մասին, ինչպես հաղորդում է «Արմենպրես»-ը, հայտնում է ադրբեջանական azadliq.info լրատվական գործակալությունը:
Ադրբեջանի Դասական ժողովրդական ճակատ կուսակցության (ԴԺՃԿ ) գերագույն խորհրդի անդամ Էլշան Ալիսովը արտաքսվել է կուսակցությունից:
Սոցկայքերի ադրբեջանական տիրույթում տեղ գտած տեղեկությունների համաձայն` Էլշան Ալիսովի կուսակցությունից հեռացվելու պատճառը եղել է այն, որ նա դատի է տվել Ադրբեջանի նախագահ Իլհամ Ալիևին:
Էլշան Ալիսովի հայրը Ադրբեջանի հերոս է, և Ալիսովը Ադրբեջանի օրենսդրության «զոհվածների ընտանիքների վերաբերյալ» օրենքի լիարժեք չգործելու պատճառով դատարանում հայց է ներկայացրել նախագահ Իլհամ Ալիևի դեմ:
Սոցկայքերում հայտնված պնդումների համաձայն` չնայած որ ԴԺՃԿ-ն ներկայանում է որպես ընդդիմադիր կուսակցություն, Ալիսովի այս քայլը մեծ մտահոգություն է առաջացրել կուսակցության ղեկավարության շրջանում, և նրանք կրելով իշխանական շրջանակների ազդեցությունը, Ալիսովին հեռացրել են կուսակցության շարքերից: