Արամ արքեպիսկոպոս Աթեշյանն ահազանգել է Թուրքիայում հայկական եկեղեցիների ոչնչացման մասին

ԵՐԵՎԱՆ, 13 ՍԵՊՏԵՄԲԵՐԻ, ԱՐՄԵՆՊՐԵՍ: Հայկական եկեղեցիների թիվը Թուրքիայում օրեցօր ավելի է պակասում:Ինչպես հաղորդում է «Արմենպրես»-ը` վկայակոչելով թուրքական Haberler.com-ը, այս մասին ահազանգել է Պոլսի Հայոց պատրիարքի փոխանորդ Արամ արքեպիսկոպոս Աթեշյանը: Պոլսի Հայոց պատրիարքի փոխանորդը, ով ծագումով Սիլվանից է, ցավով հայտնել է, որԹուրքիայի Սասուն, Սիլվան և Բիթլիս բնակավայրերում նախկինում առկա շուրջ 2 հազար եկեղեցիներից այսօր պահպանվել են միայն տասը:

Աթեշյանը նշել է, որ Սասունում հայկական ծիսակատարություններ իրականացնելու շնորհիվ Թուրքիայում ամենքն ավելի ազատ են դարձել: Պոլսի Հայոց պատրիարքի փոխանորդը հիշատակել է, որ մինչև 1914 թվականը Թուրքիայում եղել է 2 հազար 170 եկեղեցի, սակայն դրանից հետո տեղի ունեցած իրադարձությունների արդյունքում մնացել են ընդամենը 45-ը: