Սիրիայի զինված ուժերը եւ ընդդիմությունը միմյանց մեղադրում են զինադադարը խախտելու մեջ

ԵՐԵՎԱՆ, 29 ՀՈԿՏԵՄԲԵՐԻ, ԱՐՄԵՆՊՐԵՍ: Սիրիայի զինված ուժերի ղեկավարությունը հայտարարել է, որ ապստամբ զինված խմբավորումները մի քանի օր շարունակում են խախտել զինադադարի վերաբերյալ պայմանավորվածությունը: Ինչպես հաղորդում է «Արմենպրես»-ը` վկայակոչելով սիրիական ՍԱՆԱ գործակալությունը, զինյալները կրակ են բացել Դամասկոսի Կալամուն շրջանի Ալ Ջոբա գյուղում: Օրվա տարբեր ժամերին զինյալները նաեւ կրակ են բացել Աարտուզեւ Թել Աս Սաուան գյուղերի, ինչպես նաեւ Հարասթայի շրջանի ուղղությամբ:Զինադադարը խախտվել է նաեւ Հալեպում: Զինյալները կրակ են բացել Խան ալ Ասլ գյուղի, ալ Լերամուն շրջանի ռազմաբազաների ուղղությամբ:

Զինանադադարի խախտման վերաբերյալ «Ալ Ջազիրա»-ն բոլորովին այլ պատկեր է ներկայացնում` տեղեկացնելով, որ հոկտեմբերի 28-ին Սիրիայի տարածքում 131 մարդ է զոհվել, հիմնականում` Դամասկոսի գյուղերում, Հոմսում, Հալեպում եւ Իդլեբում: Կայքը տեղեկացնում է, որ Սիրիայի զինված ուժերը օդային ռմբակոծություններ են իրականացնում Դեր Զորի Բուքմալ, Հոմսի Դար գյուղաքաղաքի եւ Իդլեբի շրջաններում:

Հոկտմբերի 28-ին արյունալի բախումներ են տեղի ունեցել Դամասկոսի մոտակայքում գտնվող Թադամուն, Հաջր Ասուադ շրջաններում:

Սիրիայում ավելի քան 18 ամիս շարունակվող բախումների հետեւանքով զոհվել է 30 հազարից ավելի մարդ, այդ թվում` գրեթե չորս տասնյակ հայեր: