«Արարատ 73»-ի ֆուտբոլիստը Բելառուսին ուժեղ մրցակից է համարում, սակայն Հայաստանի հաղթանակին է հավատում
2 րոպեի ընթերցում
ԵՐԵՎԱՆ, 10 ՕԳՈՍՏՈՍ, ԱՐՄԵՆՊՐԵՍ: Բելառուսի ֆուտբոլի ազգային ընտրանին ԱՊՀ երկրների հավաքակնների շարքում երրորդն է: «Արմենպրես»-ի հետ զրույցում ֆուտբոլի ԽՍՀՄ երիտասարդական հավաքականի ավագ, «Արարատ 73»-ի անդամԱրմեն Սարգսյանն ընդգծեց, որ այս հանգամանքը հարկավոր է հաշվի առնել: Բնակչության թվովՀայաստանից մեծ Բելառուսում, հայ ֆուտբոլիստի խոսքով, ֆուտբոլիստները եւ թիմերը շատ են, հետեւաբար` կա նաեւ ընտրության ավելի մեծ հնարավորություն:«Այսօր նրանք ԱՊՀ երկրների շարքում երրորդն են: Այն, որ նրանց մինչեւ 21 տարեկանների ազգային ընտրանին մասնակցեց Լոնդոնի 30-րդ Օլիմպիական խաղերին արդեն խոսում է այն մասին, որ երկրում զարգանում է այս մարզաձեւը»,-ասաց Սարգսյանը:
Անդրադառնալով օգոստոսի 15-ին կայանալիք խաղին` «Արարատ 73»-ի անդամն առանձնակի շեշտեց, որ հանդիպումը դժվար կլինի մեր տղաների համար: Այնուհանդերձ, Սարգսյանը համոզված է, որ Հայաստանը հաղթելու է. «Չթերագնահատելով մրցակցին ասեմ, որ բելառուսները դեռ ԽՍՀՄ տարիներին միայն ուժային ֆուտբոլ էին խաղում: Պայքարի արագությունը բացակայում է նրանց մոտ»:
Ֆուտբոլի աշխարհի 2014 թվականի առաջնության ընտրական փուլից առաջ մեր ազգային ընտրանին վերջին ընկերական հանդիպումը կանցկացնի Բելառուսի հավաքականի հետ: Խաղը կկայանա օգոստոսի 15-ին Վազգեն Սարգսյանի անվան Հանրապետական մարզադաշտում: Հանդիպման տոմսերն արդեն վաճառքում են: