«Ուլիս»-«Շերիֆ» դիմակայությունում Հայաստանի չեմպիոնի հնարավորությունները հասան նվազագույնի

ԵՐԵՎԱՆ, 17 ՀՈՒԼԻՍԻ, ԱՐՄԵՆՊՐԵՍ: Չեմպիոնների լիգայի որակավորման երկրորդ փուլի առաջին խաղում Երևանի «Ուլիս»-ը սեփական հարկի տակ 0:1 հաշվով պարտություն կրեց Մոլդովայի չեմպիոն «Շերիֆ»-ից: Ինչպես հաղորդում է «Արմենպրես»-ը' հանդիպումն անցավ հավասար պայքարում, սակայն Մոլդովայի չեմպիոնն, ի տարբերություն «Ուլիս»-ի, կարողացավ իրացնել իր ստեղծած մի քանի գոլային պահերից մեկը և հասնել հաջողության: Հանդիպման 61-րդ րոպեին անկյունայինի իրացումից հետո գնդակը հայտնվեց Գեորգիևի մոտ, ում հարվածից հետո գնդակը հայտնվեց մեր թիմի դարպասի վերին անկյունում:

Մինչ այդ` հանդիպման սկզբում, «Ուլիս»-ը և «Շերիֆ»-ն ունեին մի քանի գոլային հնարավորություններ: Նախ`15-րդ րոպեին Նորայր Գրիգորյանը գնդակը փոխանցեց մրցակցի տուգանային հրապարակ, սակայն խառնաշփոթ իրավիճակում մերձդնեստրյան թիմի դարպասապահ Ստոյանովը փրկեց «Շերիֆ»-ին: Այնուհետև առաջին կեսի միջնամասում մեր պաշտպաններից սեփական տուգանայինի մատույցներում Միխեիլ Սիմոնյանն անփույթ կերպով գնդակը փոխանցեց մրցակցի հարձակվող Մարջանովիչին, ով մեն-մենակ դուրս եկավ Էդվարդ Հովհաննիսյանի դեմ և հարվածեց «Ուլիս»-ի դարպասին. մեր թիմին փրկեց դարպասաձողը: Այս դրվագին անմիջապես հետևեց «Ուլիս»-ի հակագրոհը, սակայն Նորայր Սահակյանի եզրից կատարած հուժկու հարվածը հետ մղեց կրկին Ստոյանովը:

Առաջին կեսի 35-րդ րոպեին «Ուլիս»-ն այս խաղում ունեցավ իր ամենաիրական գոլային պահը. մրցակցի դարպասապահի դեմ մեն-մենակ հայտնվեց Շոթա Ջիքիան, ում ուժեղ հարվածը հետ մղվեց ուղղահայաց դարպասաձողից:

Հանդիպման երկրորդ կեսն անցավ «Ուլիս»-ի տարածքային առավելությամբ, սակայն Հայաստանի չեմպիոնին չհաջողվեց կազմակերպել ոչ մի գոլային գրոհ:

Ընդհանուր առմամբ մեր թիմի գործողություններն անհասկանալի էին. կարծես մրցակիցն այնքան էլ հզոր թիմ չէր, որից մեծապես զգուշանում էին հայ ֆուտբոլիստները: «Շերիֆ»-ը և ինքն էր գրոհում, և թույլ էր տալիս մրցակցին գրոհել, սակայն «Ուլիս»-ի ֆուտբոլիստները կարծես չէին հավատում, որ կարող են գրավել մրցակցի դարպասը:

Այս թիմերի պատասխան մրցավեճը կկայանա հուլիսի 24-ին' Տիրասպոլում: