ԱՄՆ պետքարտուղարը Սաուդյան Արաբիայի գործընկերոջ հետ քննարկել է տարածաշրջանային անվտանգության վերաբերյալ հարցեր
2 րոպեի ընթերցում
ԱՄՆ պետքարտուղար Մարկո Ռուբիոն Վաշինգտոնում ընդունել է Սաուդյան Արաբիայի արտաքին գործերի նախարար, արքայազն Ֆեյսալ բին Ֆարհան ալ-Սաուդին։ «Արմենպրես»-ի փոխանցմամբ՝ այս մասին հաղորդում է ԱՄՆ պետքարտուղարությունը։
Կողմերը շարունակել են ՄԱԿ-ի Գլխավոր ասամբլեայի նիստի շրջանակներում տեղի ունեցած քննարկումները տարածաշրջանային անվտանգության և կայունության, այդ թվում՝ Իրանի, Գազայի, Լիբանանի, Սուդանի և այլ տարածաշրջանային հարցերի շուրջ երկկողմ համագործակցության վերաբերյալ։
Սաուդյան Արաբիայի արտաքին գործերի նախարարությունն իր հերթին X հարթակում գրառման մեջ անդրադարձել է երկկողմ հանդիպմանը։
«Հանդիպման ընթացքում ընդգծվել է ծովային անվտանգության և նավագնացության ազատության ապահովման կարևորությունը՝ հատկապես Հորմուզի և Բաբ էլ-Մանդեբի նեղուցներում՝ նպաստելու տարածաշրջանային կայունությանը, ինչպես նաև համաշխարհային առևտրի և մատակարարման շղթաների անխափան ընթացքին», - նշված է գրառման մեջ։
Ըստ հաղորդագրության՝ կողմերը վերահաստատել են Սաուդյան Արաբիայի և ԱՄՆ-ի միջև փոխադարձ հետաքրքրություն ներկայացնող հարցերի շուրջ համակարգման և խորհրդակցությունների շարունակականության, ինչպես նաև տարածաշրջանային ճգնաժամերի լուծման և անվտանգության, խաղաղության և կայունության առաջխաղացման դիվանագիտական ջանքերին աջակցելու կարևորությունը։